Journalistar misnøgd etter presseseanse med Sylvi Listhaug: – Ikkje haldbart

Onsdag vart det kjent at statsminister Erna Solberg gjer fleire endringar på regjeringskabalen. Blant endringane er at Sylvi Listhaug tek over som olje- og energiminister etter Kjell-Børge Freiberg.

Under nøkkeloverrekkinga vart journalistane først lova éin-til-éin-intervju etter fellesseansen. Så kom kontrabeskjeden om at dei ikkje fekk intervju med statsråden.

– Eg vart veldig overraska over at Berthelsen (kommunikasjonssjef i OED, journ. anm.) kutta éin-til-éin etter at pressa hadde stilt fellesspørsmål, seier journalist Heidi Schei Lilleås i Nettavisen til Medier24.

Sjå video av den oppheita krangelen hos Nettavisen.

Ikkje nøgd

Til slutt fekk dei krangla til seg kvar sine éin-til-éin-intervju – med klare avgrensingar.

– Me fekk ikkje stilla meir enn eitt spørsmål kvar. Det er ikkje feil å seia at pressa reagerte på det, seier leiar av presselosjen og politisk journalist Mats Rønning i Dagbladet til Medier24.

– Me brann inne med fleire spørsmål. Det er nok eit uttrykk for at departementet no har fått ein sjef som blir møtt med større medieinteresse enn forgjengarane, seier Rønning vidare.

Han er meiner deler av problemet vart løyst ved at dei fekk stille kvar sitt spørsmål. Men:

– Eg trur ikkje eg er åleine om å ynskja lengre tid for fleire spørsmål.

– Ein journalist vil aldri vera nøgd før ein har fått stilt alle spørsmåla sine. I dag fekk me ikkje det, seier han vidare.

Lilleås legg til:

– Kommunikasjonssjef Ole Berthelsen i departementet svarte at det hadde blitt så mange spørsmål rundt hennar nye kontor, men det er ikkje haldbart. Mange oppfatta at me skulle stilt spørsmål éin-til-éin, så me hadde spart spørsmål til seansen etterpå. Eg har aldri opplevd liknande. Me snakkar her om ein driven kommunikasjonssjef og driven politikar, som også er omstridd. Erna Solberg fekk ein del spørsmål om ho, og det var viktig at me fekk konfrontera ho om det same.

– Ikkje så enkelt å løysa

Kommunikasjonssjef Ole Berthelsen i Olje- og energidepartementet forklarar det med stor pågang.

– Det var veldig stor pågang under nøkkeloverrekkinga, og statsråden brukte mykje tid på å svara på spørsmål i plenum. Etter overrekkinga vart det arrangert fleire éin-til-éin-intervju, seier han til Medier24.

– Det vesentlege er at det vart gitt veldig god tid til å stilla spørsmål under nøkkeloverrekkinga, og at det i tillegg vart gitt moglegheit for éin-til-éin etterpå. Det viktigaste er at dei fekk det dei faktisk ynskja.

– Forstår du at ein ynskjer å spara nokre av spørsmåla til eksklusive éin-til-éin-intervju?

– Ja, men om 20 ulike journalistar ynskjer eksklusivitet er det ikkje så enkelt å lysa. Me prøvde å få til ei best mogleg løysing, og så noterer me at ikkje alle var nøgd i dag.

– Er departementet førebudd på meir medietrykk når Listhaug no vert statsråd?

– Me må rekna med at det er stor interesse når det er statsrådsskifte. Det er me budd på.

– Aldri ei god løysing

Lilleås fekk sjølv stilt eit oppfølgingsspørsmål.

– Men eg tykkjer det aldri er ei god løysing å berre stilla eitt spørsmål. Det er oppfølgingsspørsmåla som er dei beste, seier ho.