Dagleg leiar Guri Størvold (t.h.), her saman med tre nytilsette i 2019, Cecilie Brein Karlsen, Fredrik Wang Gierløff, Sigurd Brekke.

Ilja Hendel

Rekordår for Zynk i 2019: Eigarane med 100 millionar i utbyte på ti år

– 2020 er ein heilt annan tidsalder, seier partnar og dagleg leiar Guri Størvold. Men den negative koronaeffekten uteblir – førebels.

Ole Alexander Saue

Publisert 31.03.2020 - 12:50

Denne artikkelen er over to år gammel.

Kommunikasjonsbyrået Zynk leverte i 2019 nok eit vekstår. Selskapet passerte 58,7 millionar kroner i omsetnad, og fekk eit resultat før skatt på 20 millionar kroner. Det gir ein margin på heile 34 prosent.

Utbytefest for eigarane

Byråinntekta, som er honorar fråtrekt varekostnad, enda på 49,7 millionar kroner. Det er opp frå 44,8 millionar kroner året før.

– Det kjennest så innmari lenge ut sidan 2019. 2020 er ein heilt annan tidsalder. Me har ikkje hatt tid til å tenkja på resultatet vårt ein gong, seier partnar og dagleg leiar Guri Størvold når Medier24 tek kontakt.

Partnarane Størvold, styreleiar Claus Sonberg, Hans Olav Otterlei, Jan Glendrange og Sigurd Grytten kan etter eit sterkt 2019 dela eit utbyte på 15,7 millionar kroner.

Dermed har selskapet samla betalt ut over 100 millionar kroner til partnarane sidan oppstart i 2010.

Zynk	2019	2018	Endring
Omsetning	58,7 mill.	54,9 mill.	6.9 %
Byråinntekt	49,7 mill.	44,8 mill.	10.9 %
Driftsresultat	20,2 mill.	19,8 mill.	2 %
Resultat før skatt	20,2 mill.	19,8 mill.	2 %

Driftsmargin	34.4 %	36.1 %

Trossar koronakrisa

Selskapet vart starta av Sonberg, Glendrange og Otterlei i 2010, og har sidan vakse med stø kurs.

– Det er eit godt 2019-resultat, og det kjem som vanleg av hardt arbeid, satsing på stordataanalyse, lange kundeforhold og gode rekrutteringar. Det interessante er at me veks på alt anna enn PR. Me gjer veldig lite klassisk PR-arbeid, og me går meir i forretningsstrategisk retning, seier Størvold vidare.

– De opererer nok ein gong med marginar på over 30 prosent. Kva er nøkkelen?

– Me jobbar mykje. Det er det enkle svaret. Me er mange som jobbar lange dagar, og det blir det gode resultat av. Og så har me eit ekstremt sterkt og seniortungt team, så nesten alle hos oss er kundeansvarlege. Me har stort sett berre folk med minumum 15-20 års erfaring frå journalistikk, politikk og kommunikasjon.

Guri Størvold, dagleg leiar og artnar i kommunikasjonsbyrået Zynk.

– Og de prisar dykk deretter?

– Det er klart. Men resultatet handlar først og fremst om at me jobbar mykje.

Størvold er tidlegare statssekretær frå Senterpartiet i Stoltenberg II-regjeringa.

Koronakrisa har so langt kosta dyrt for det norske næringslivet. Norge er stengt ned og arbeidsløysa har ikkje vore større sidan 1930-talet. Både og medie- og PR-bransjen permitterer i veksande omfang.

Hos Zynk, derimot, er det ingenting som tyder på at dei må gå til det skrittet enno. Faktisk har dei vekst i omsetnaden samanlikna med denne perioden året før.

– Men me er usikre på effekten på lengre sikt. Sjølv om det er godt trykk no, veit me ikkje korleis det ser ut om nokre månader, seier Størvold.

Trur på godt overskot i 2020

Men om det blir eit godt resultat, og etterfølgjande utbytefest, også i 2020, vil ho ikkje spå.

– Men me har eit mål om å skapa eit godt overskot i 2020 også, sjølv om ting står på hovudet. Me veit nok meir over sommaren, seier Størvold.

Zynk tek få oppdrag innanfor PR- og marknadsføringsoppdrag, men har fått ein sterk posisjon innanfor analyse, myndigheitskontakt, krisehandtering og omstilling.

– Andre byrå må permittera. Har de ein skreddarsydd tenesteportefølje for ei tid som dette?

– Eg trur nok det. Me gjer ikkje PR. Det me driv på med er kriseberedskap, leiings- og endringskommunikasjon, analyse, og det er det behov for også i situasjonen me er i no.