Gründer-avis drog inn over 600.000 kroner på podkast i fjor

Nettavisa for energibransjen, enerWE, omsette i 2019 for 625.000 kroner på annonsørfinansiert podkast i 2019.

Med ein prislapp på 30.000 kroner per podkast, lagar administrerande direktør og «energiambassadør» Chul Christian Aamodt podkast-episodar kjøpt og betalt av annonsørar.

– Me vart sponsa av Equinor på denne typen ting lenge før Aftenposten gjorde det, seier Aamodt.

Det skapte nemleg stor debatt i mediebransjen då Aftenposten i fjor haust lagde sponsa podkast-episodar for Equinor under «Forklart»-namnet. Dåverande sjefredaktør og administrerande direktør Espen Egil Hansen gjekk seinare ut og varsla fleire endringar etter den massive kritikken av annonsørinnhaldet.

– Salspitchar fungerer ikkje

Dette gjorde likevel enerWE i stor skala i heile 2019. Aamodt såg ei rekkje annonsørar bruke titusenvis av kroner på standplass på konferansar og messer. Då føreslo han for annonsørane å heller putta pengane i podkast, for å nå ut til fleire.

– Gjennom podkasten vår får ein prate i eit kvarter med meg, og då når ein ut til mange fleire, seier Aamodt til Medier24.

– Då spør eg dei om verdien der ikkje er større enn det ein betalar for ein utstillar-stand? Då svarar dei ja, og så er me ganske nære eit sal. Det er verd å ta den type pratar, seier Aamodt.

– Korleis kan ein skapa verdifullt innhald for lesarane, når programmet er kjøpt og betalt av eit selskap som vil ut med sin bodskap?

– Det som vert opplevd som ein salspitch, fungerer ikkje. Ein skal alltid læra noko i vår podkast. Det skal vera tydleg kven som er avsendar, men om lyttaren lærer noko, gir det verdi. Det er ikkje sikkert eg er samd med annonsørane i alt, og då seier eg at eg kjem eg til å stilla spørsmål ved det. Og då svarar dei, seier han.

– Kundane bryr seg ikkje om at det er annonsørinnhald – så lenge nok menneske lyttar til det. Og så lenge innhaldet er relevant, gjer det heller ikkje så mykje for lyttaren at det er annonsørinnhald, legg Aamodt til.

Han trur at annonsørane oppnår større effekt om ein lanserer ein bransjerapport eller -analyse dersom ein tek det opp i ein kommersiell podkast, i staden for å invitera til frukostmøte og liknande arrangement.

På kundelista til enerWE finn ein selskap som Agder Energi, Equinor, Norsk olje og gass, Energi Norge, LO, NHO, Fortum og Sintef.

Aamodt er oppteken av eit tydeleg skilje mellom deira kommersielle og redaksjonelle podkastar – og at desse går i ulike podkastfeedar.

Har lege i fosterstilling

Men sjølv om dei nådde ein podkast-topp i fjor, går selskapet likevel i minus. I fjor hadde dei inntekter på 4,1 millionar kroner og fekk eit negativt resultat før skatt på 66.000 kroner. Dei fire føregåande åra har resultert i eit samla tap på dryge 5,5 millionar kroner.

– Det var litt uheldig at me ikkje klarte å gå i pluss i fjor, for me har løfta oss veldig. I år er det 50 prosent sjanse for å gå i pluss. Det kjem an på hausten. Koronakrisa skapar også nye moglegheiter, seier han.

– Men eg har også lege i fosterstilling. Det har ikkje berre vore enkelt den siste månaden, presiserer han.

• For ordens skyld: Aamodt er tidlegare styremedlem i Medier24, og eigde ti prosent av selskapet gjennom Screensailor.