Her står journalistane tett i tett: – Flaut

Onsdag vart Tom Hagen framstilt for fengsling, sikta for drap eller medverking til drap på si eiga kone, Anne-Elisabeth Hagen. Sjølv nektar han straffskuld.

Då advokat Svein Holden møtte pressa utanfor Nedre Romerike tingrett, flokka journalistane seg tett i tett. Stikk i strid med helsemyndigheitene sine anbefalingar om to meter avstand og grupperingar på maks fem personar som følgje av koronaviruset.

– Dette var pressa si skuld. Tingretten hadde lagt til rette, og så brøyt det nok litt saman, seier NTB sin leiar for visuell kommunikasjon, Christina Dorthellinger Nygaard, til Medier24.

– Må ikkje skje igjen

Det er NTB-fotograf Heiko Junge som har teke oversiktsbileta av journalistane.

– Eg reagerte på biletet, seier Dorthellinger Nygaard til Medier24.

– Det må ikkje skje igjen, og difor tek me no forholdsreglar. Frå no av skal NTB sine utsende ha med seg munnbind i tilfelle liknande situasjonar oppstår igjen, legg ho til.

Ho meiner det også gir ein signaleffekt når sjølv pressa ikkje klarar å følgja anbefalingane om avstand.

– Dersom me skal utfordra andre på kva sikkerheitsrutinar dei har, må me sjølv kunne stå inne for at me også følgjer råda, seier ho.

– Det er litt flaut, og slik burde me ikkje gjera det. Akkurat det augneblinksbiletet kan gi eit inntrykk av at me ikkje respekterer retningslinjene, seier ho vidare.

– Journalistane må ta det på eiga kappe

Heidi Bruvoll ved Nedre Romerike tingrett fortel til Medier24 at det vart forsøkt tilrettelagt for pressa, men at det ikkje fungerte slik det burde.

– Me gjorde det me kunne for å leggja til rette for pressa. Dei fekk ikkje koma inn i salen, men måtte sjå frå videolink, på grunn av omsyn til smittevern. Ved intervju utanfor tingretten skulle me også ha ei oppmerkt sone for intervju, seier Bruvoll.

I tillegg vart det varsla om foto-pool inne i sala.

– Me må passa på aktørane i retten – og så tenkjer me at media må ha eit ansvar sjølv å halda avstanden seg i mellom, seier ho.

Kadafi Zaman vil ha betre planlegging

TV 2-journalist Kadafi Zaman, som dekkjer Hagen-saka, er ikkje samd i at journalistane må ta det på eiga kappe.

– Tingretten kunne lagt opp på ein annan måte, med større plass, til dømes. Dei har skjønt at journalistar frå heile Norge – og heile Norden – er interessert i denne saka, seier han.

Zaman føreslår ei grense for kor mange som kan koma frå kvart mediehus.

– Ein kunne hatt betre planlegging, og sagt at éin journalist eller éin fotograf frå kvart mediehus er grensa.

Han seier at dei først forsøkte å laga ein ring på det oppmerkt området, men at det ville vore umogleg med avstanden til Holden.

– Dette kan nok løysast med betre planlegging og dialog mellom pressa og tingretten, seier han.

NR og NJ med brev til Holden

Leiar Hege Iren Frantzen i Norsk Journalistlag støttar Zaman, og meiner det burde blitt betre tilrettelagt.

– Det er rart å seia at dette er journalistane si skuld åleine. Ein burde tilrettelagt betre slik at ein kunne gjort intervju utan at ein må stå i kø, seier Frantzen til Medier24.

No har NJ og Norsk Redaktørforening sendt eit brev til Politiet i Øst, Domstolsadministrasjonen, Nedre Romerike tingrett og advokat Svein Holden, kor dei ber om betre tiltak for smittevern.

«I lys av sakens store offentlige interesse, mener vi at både politiet, domstolen og Holden burde vært forberedt på at noe slikt kunne skje, og at det var behov for et tilrettelagt møte mellom siktedes forsvarer og mediene etter fengslingsmøtet, både for å ivare ta journalistenes helse og å innfri myndighetenes råd for samlinger under korona-krisen», skriv dei.

Bruvoll i Nedre Romerike tingrett er usikker på om det ville latt seg gjera som Zaman føreslår.

– Eg tykkjer det er vanskeleg å vita korleis me kunne gjort det annleis, med tanke på at media ikkje klarte å halda avstand sjølv. Med eit større område vil avstanden til Holden blitt for stor, og så trur eg det vil vera vanskeleg å hindra at det kjem meir enn éin person frå kvart mediehus, seier ho.