Det ettertrakta stjerneskotet Erling Braut Haaland frå Bryne.
Det ettertrakta stjerneskotet Erling Braut Haaland frå Bryne.

«Haaland på veg til Manchester», meldte Aftenbladet – og finta ut ei heil fotballverd

– Me burde sjølvsagt ikkje ha skrive Manchester, men venta litt til, og fått det ytterlegare stadfesta, seier nyheitsredaktør Carl Gunnar Gundersen i Stavanger Aftenblad.

Publisert

Fredag morgon meldte Stavanger Aftenblad at det norske stjerneskotet Erling Braut Haaland var på veg til Manchester. Red Bull Salzburg-spissen har vore sterkt kopla til den engelske storklubben Manchester United i lengre tid.

Kort tid etter kunne VG melda «AFTENBLADET: HAALAND ER PÅ VEI TIL MANCHESTER» i sitt direktestudio.

Så følgde Dagbladet og resten av norsk presse opp.

Og så rulla ballen vidare – og nådde kjapt internasjonale medium. United-manager Ole Gunnar Solskjær fekk i tillegg spørsmål om Haaland-flyturen på ein pressekonferanse fredag.

Fleire engelske journalistar og fotografar møtte opp og venta på nordmannen på Manchester Airport, skriv Dagbladet, som sjølv møtte opp på flyplassen i vente på Haaland.

Så fekk Dagbladet opplyst at nordmannen landa i København.

Deretter gjekk Aftenbladet tilbake på saka om at han var i Manchester, endra artikkelen – og fjerna sportsleiar Stig Nilssen i Aftenbladet som forfattar på saka. No er det «Stavanger Aftenblad» som har byline på artikkelen.

Nilssen viser til nyheitsredaktør Carl Gunnar Gundersen når Medier24 tek kontakt. Gundersen forklarar feilen slik:

– Haaland er ein veldig attraktiv fotballspelar med mange spekulasjonar rundt. Me fekk gode indikasjonar på at han var på veg dit, og så viste det seg at han var på veg til København. Der tok me feil.

– Me burde sjølvsagt ikkje ha skrive Manchester, men venta litt til, og fått det ytterlegare stadfesta.

– Er ein meir slepphendt med å verifisera rykte knytt til fotballovergangar?

– Nei, det skal ikkje vera det. Me hadde gode indikasjonar, og det var ingen grunn til at det ikkje stemte. Det er vurderingar ein må ta på veldig kort tid. I etterkant ser me at me burde me ha venta litt. Det skjer fort i denne verda, så det er ei avveging. Det var vanskeleg. Ein er heilt sikker når ein publiserer – elles hadde me ikkje gjort det, og så fekk me nye opplysingar kort tid etter.

– Kva tenkjer de om oppstyret med internasjonal presse?

– Det kan me ikkje gjera så mykje med, for me må sørgja for eigen journalistikk. Me var på flyplassen sjølv i Manchester – så det er ikkje slik at me berre set i gang andre. Men me kan ikkje kontrollera kva andre gjer.

– Kvifor endra de byline?

– Det var Aftenbladet som skreiv saka. Me tok ei vurdering på å gjera om byline.

– Fordi den er feil, eller fordi fleire har jobba med den?

– Av mange grunnar, men det er Aftenbladet som tek ansvar.

– Gjer de det ofte?

– Det hender at me endrar byline. Ikkje ofte.

– Kva tek de ansvar for? At saka var feil?

– Aftenbladet er ansvarleg for alt som vert skrive, og det er me her og.

– Er det for å skåna medarbeidarar?

– Ikkje nødvendigvis. Men me følte det var rett her.

– Beklagar de på noko vis?

– Me følgjer saka tett vidare.

Powered by Labrador CMS