Regjeringa vurderer å skrote forslaget til ny Offentleglov. No slaktar Rødt-Moxnes prosessen

Det er snart eit år sidan fristen gjekk ut for å gi høyringsinnspel for regjeringa og Justisdepartementet sitt forslag om å endre Offentleglova. Der føreslo dei mellom anna at oppføringar i elektroniske kalendrar skulle bli unnateke frå innsynsretten.

Både presseorganisasjonane og opposisjonen gjorde det dei kunne for å hindre gjennomslag, og regjeringa fekk kraftig kritikk for den korte høyringsfristen.

– Merkeleg prosess

Det har snart gått eit år sidan fristen gjekk ut, og det har gått fire månadar sidan dei hadde lova å sende forslaget til Stortinget. No er den i tillegg fjerna frå lista over proposisjonar som skal leggast fram.

– At regjeringa, så vidt me kan sjå, ikkje har sagt eit pip om kva som er årsak til forseinkinga og at forslaget er fjerna frå lista over forslag som skal sendast til Stortinget, gjer det endå meir oppsiktsvekkjande, seier Rødt-leiar Bjørnar Moxnes til Medier24.

Han legg til:

– Heile denne prosessen har vore merkeleg. I fjor hadde tydelegvis regjeringa så stort hastverk med å få saka sendt til Stortinget, at dei gav ein unormalt kort høyringsfrist til rørte organisasjonar og institusjonar, noko Sivilombodsmannen såg på som eit mogleg brot på utgreiingsinstruksen.

Droppar kanskje forslaget

Moxnes sende nyleg eit skriftleg spørsmål til justisminister Jøran Kallmyr (Frp) og bad om status for det varsla forslaget og årsaka til den korte høyringsperioden.

I sitt svar skriv Kallmyr:

«Forslaget til lovendringer var begrenset, og de foreslåtte lovendringene fortonet seg såpass enkle og oversiktlige at departementet fant det forsvarlig med den høringsperioden som ble stilt opp i høringsbrevet 4. juli 2018. Høringsrunden viste imidlertid at det var sterke og prinsipielle motforestillinger mot deler av forslaget. Det er derfor ikke tatt endelig stilling til om og eventuelt i hvilken form lovforslaget skal fremmes for Stortinget.»

Justisministeren gir det same svaret på Medier24 sine spørsmål til Kallmyr.

– Kall det gjerne Lex-Solberg

Generalsekretær Elin Floberghagen i Norsk Presseforbund reagerte i fjor på at regjeringa vil lukke innsyn i kalenderoppføringar. Saman med Norsk Redaktørforening, Fagpressen, Norsk Journalistlag, Mediebedriftenes Landsforening og Landslaget for lokalaviser skreiv dei eit felles kritisk høyringssvar om forslaget.

Både Arbeidarpartiet, Senterpartiet og Sosialistisk Venstreparti kasta seg med på kritikken. Også Raudt er sterkt imot, ifølgje Moxnes.

– Med dette forslaget som mellom anna avskaffar innsyn i statsministeren sin elektroniske kalender vil Solberg huskast som ho som ville forandre lova slik at folk ikkje skal få vite kven ho møter. Kall det gjerne Lex-Solberg eller Solberg-lova, seier han, og legg til:

– Det er forståeleg at milliardærane sin statsminister ikkje vil at folk skal vita kven ho møter. Men me kan ikkje la statsministeren øydeleggje dagens norske lovgiving om openheit og innsyn òg for framtida, berre fordi ho vil halda møta sine hemmelege.

Moxnes er samd med presseorganisasjonane, og meiner det er viktig med eit lovverk som sikrar størst mogleg grad av openheit for ei fri og kritisk presse.

– Slik sett symboliserer Solberg-lova nesten alt det negative denne regjeringa har gjort mot demokratiet vårt.

Medier24 har beden Solberg om kommentar til saka, men statssekretær Rune Alstadsæter opplyser at statsministeren er oppteken med budsjettkonferanse. Statssekretær Sveinung Rotevatn (V) i Justisdepartementet sa i fjor til Medier24 at lovforslaget ikkje medfører forbod mot å gi innsyn i kalenderinnføringar.