Tysdag kunne ein lesa på Høgre si Facebook side at Høgre er partiet som aukar mest, ifølgje ei fersk meiningsmåling. Kjelde var Vårt Land, 28.05.2019, ifølgje biletet som vart delt.
Problemet var at Vårt Land aldri hadde publisert ei slik måling.
Avtale mellom media og politikarar
Facebook-posten Høgre la ut på Facebook tysdag kveld.Skjermdump
– Det som skjedde var at me hadde tilgang til målinga, som skulle publiserast fredag. Me trykte rett og slett publiser på feil tidspunkt, seier Daniel Torkildsen, kommunikasjonssjef i Høgre, til Medier24.
Berit Aalborg, politisk redaktør i Vårt Land, seier til Medier24 at dei har teke mot beklaginga, men er tydeleg på at slike ting ikkje skal skje.
– Det var ein feil, og det skal ikkje skje. Det er ofte avtalar mellom media og politikarar der me gir dei tal og let dei kommenterer dei, og så ventar dei til me har publisert før dei går ut med noko.
Torkildsen seier til Medier24 at det var ein intern glipp som forårsaka feilen.
– Me trakk den tilbake så fort me oppdaga det. Det var ein intern glipp. Me ville aldri gjort dette med overlegg, seier han.
Innanfor feilmargin
Aalborg i Vårt Land tykkjer det er problematisk at Høgre går ut med «sin versjon» av målinga, når det finst meir interessante og vesentlege poeng i saka.
Kommunikasjonssjef og rådgjevar for parlamentarisk leiing i Høgre, Daniel Torkildsen.Birgitte Aarebrodt
– Det einaste som er feil er at dei går ut med eigne tal – som er innanfor feilmarginen. I tillegg har målinga element som er meir interessant – og det ser ein når målinga kjem, seier ho.
– Har dei gått ut med misvisande tal?
– Isolert sett er det riktig, men dei er innanfor feilmarginen. Det er andre utslag på målinga som er absolutt signifikante, og som er endå viktigare, seier Aalborg.
Torkildsen meiner dei har sitt på det reine, og er ikkje samd i at dei har publisert misvisande informasjon frå målinga.
– Alle målingar har feilmarginar, så det er ikkje noko nytt for denne målinga som såleis. I denne målinga er Høgre partiet som går mest fram, men det er feilmargin her, seier han.
Politisk kommentator i Bergens Tidende, Jens Kihl, er blant dei som reagerte på Facebook-innlegget. «Braut ut og publiserte før avisa. Og publiserte ein påstand som i beste fall er syltynn. No snakkar vi her», skreiv han på Twitter.
– Uheldig
No seier Vårt Land at dei har lagt saka bak seg.
– Høgre har gjort ein feil og har beklaga. Feil kan både me og dei gjere, så me tek beklaginga og er ferdig med saka, seier Aalborg.
Torkildsen stemmer i:
– Me har vore i kontakt med Vårt Land og beklaga overfor dei. Dette var ikkje meininga frå vår side.
– Korleis tok Vårt Land det?
– Eg opplevde at dei viste forståing, sjølv om eg har forståing for at det er uheldig.
