Det har i lengre tid vore ei kjent sak at Amedia-eigde BA ynskjer seg ut frå milliardprosjektet MCB i Lars Hilles Gate i Bergen. Måndag signerte dei avtale med EGD Property om å flytta til nye lokale i Bergen sentrum, like ved Johanneskirken.
– Me har vakse både sidan me flytta inn og sidan me signerte leigekontrakten med MCB, seier sjefredaktør Sigvald Sveinbjørnsson i BA til Medier24 måndag.
I haust har det blitt jobba hardt for å finna det optimale bygget, og no er det altså klart at dei flyttar inn i Bergen sentrum, nærare folket – berre tre år etter at dei flytta inn i MCB hausten 2017. Dei går då frå dryge 600 m² til 900 m².
– Me får no eit inviterande BA-hus, kombinert med restaurant i første etasje. No blir det enklare for lesaren å komma i kontakt med oss, seier Sveinbjørnsson.
– Korleis blir det å forlata «akvariet», kor ein ser både opp og ned på konkurrentane?
– Eg vil ikkje sakna BT veldig mykje. Dei ser ned på oss med sitt ulme blikk, seier Sveinbjørnsson.
Saka held fram under illlustrasjonen.
Hatar ordet «synergiar»
Bergensavisen sine framtidige lokale i Bergen sentrum. ILLUSTRASJON.
TV 2, NRK Hordaland og Bergens Tidende er alle lokalisert i mediebyen. I tillegg ei lang rekkje it-selskap, Universitetet i Bergen (UiB) si medieutdanning og Senter for undersøkende journalistikk (SUJO).
– Har det blitt noko av synergieffektane ein snakka om før de flytta inn?
Sjefredaktør Sigvald Sveinbjørnsson i Bergensavisen ser opp på storebror Bergens Tidende i etasjen over i Media City Bergen. – Kjem ikkje til å sakna dei veldig mykje, seier Sveinbjørnsson.Ole Alexander Saue
– Det er umogleg å seia. Eg hatar ordet «synergiar», men det har hjelpt med nærleik til Universitetet i Bergen, til dømes. Men eg trur synergiane kan hentast ut sjølv om ein ikkje deler adresse.
Avtalen mellom BA og Entra vart signert av tidlegare redaktør Anders Nyland i 2014. Eit drygt år før innflytting vart Sveinbjørnsson redaktør.
– Hadde du skrive under på den avtalen då du vart tilsett?
– Nei, eg trur ikkje det – med utgangspunkt i dei arealplanane som eg såg då eg byrja. Men det er lett å vera etterpåklok.
Likevel rosar han UiB og SUJO, som Sveinbjørnsson meiner har hatt ei positiv utvikling sidan dei flytta inn.
– Me har hatt god nytte av dei, seier Sveinbjørnsson.
Må få inn ny leigetakar
Leiar for huseigar Entra i Bergen, Sturla Hjelmervik, skriv følgjande i ein e-post til Medier24:
«Vi er alltid lei oss for å miste gode leietakere, men samtidige synes vi det er hyggelig at BA opplever stor vekst både når det gjelder abonnenter og medarbeidere».
Han insisterer på å få spørsmål på e-post, og svarar «ja» på om dei har tru på å få inn nye leigetakarar.
Media City Bergen.Bård Bøe
– Me har ein god dialog med Entra, seier Sveinbjørnsson til Medier24.
– Er det formalitetar som står att?
– Me må prøva å få inn andre som skal sitja her. Men dei er eg overtydd om at finst, seier han.
– Kva om de ikkje får til det?
– Det får me til. Nokre månadar overlegg får so vera, seier Sveinbjørnsson.
«Vi jobber alltid for å finne gode løsninger sammen med vår leietakere, og det vil vi også gjøre denne gangen», skriv Hjelmervik vidare i e-posten.
Dei nye kontora er ifølgje Sveinbjørnsson eit gammalt bygg som skal rehabiliterast, og avtalen med EGD Property strekk seg over ein periode på fem år, med opsjon på fem nye.
Fersk sjefredaktør Frøy Gudbrandsen i Bergens Tidende svara slik på spørsmål om ho kjem til å sakna BA og kva ho tykkjer om at dei no flyttar:
– Sjølvsagt kjem eg til å sakna både Sigvald og resten av BA. Det er fine folk. Eg stolar på at BA tar beslutningane som er rett for dei.
