Til venstre er Peder W. Egseth (H) og statsminister Erna Solberg (H). Til høgre er Bergens tidende-kommentator Jens Kihl.

åkon Mosvold Larsen / NTB scanpix og Erik Waatland

«Slukt byttet rått», skreiv Solberg-rådgjevar. – Han burde vore vaksen nok til å beklage, svarar Jens Kihl

– Om Peder Egseth berre seier at dette vart feil, og at dei bomma, så løyser det problemet, seier kommentator i Bergens Tidende, Jens Kihl, til Medier24.

Ole Alexander Saue

Publisert 15.05.2019 - 12:31

Denne artikkelen er over to år gammel.

Debatten har rast etter justisminister Jøran Kallmyr (Frp) sin tale på Jørstadmoen 8. mai, kor han snakka om «fridom mot sosialisme» etter andre verdskrig.

Både norske politikarar og russiske styresmakter har reagert på manglande takk til Sovjet sin innsats under krigen. Det var òg grobotn for Jens Kihl i Bergens Tidende sin kommentar «Ein frigjeringsdag for alle», kor han kritiserte Kallmyr sin tale.

«Så du fikk ikke med deg den delen av talen hvor han takket russerne for at de hjalp oss? De klippene som lå ute var relevant for kritikerne. Og noen har slukt byttet rått», skreiv Erna Solberg sin politiske rådgjevar, Peder Weidemann Egseth, på Twitter laurdag.

Kihl hadde nemleg ikkje lese heile talen, men fått beskjed frå Justisdepartementet om at delane av talen som allereie var publisert var dei sentrale punkta i talen.

– Eg fekk ei forsikring frå Justisdepartementet om at delane av talen som låg ute var relevant for det eg skulle skrive, seier Kihl til Medier24.

Når talen vart offentleggjort, viste det seg at det ikkje vart uttrykt ei eksplisitt takk overfor sovjetiske soldatar.

– Ingen takk til sovjetiske soldatar

Kihl meiner Egseth med dette la opp til at anten han, eller departementet, ikkje hadde gjort jobben sin.

– Ved å hevde eg ikkje hadde inkludert andre, viktige deler, av talen, la han opp til at anten eg, eller embetsverket – Justisdepartementet – ikkje hadde gjort ein god nok jobb. Han gir inntrykk av at eg har vore selektiv i bruk av kjelder og sitat, for å gi eit urettferdig inntrykk av saka overfor mine lesarar, seier Kihl.

På tidspunktet Egseth skreiv til Kihl på Twitter låg ikkje tala ute offentleg.

– Då tala vart lagt ut, viste det seg at dei hadde gjort jobben sin. Det viste òg at det ikkje var grunnlag for å seie eg var selektiv i bruk av sitat. Det finst ingen takk til sovjetiske soldatar i den talen, seier Kihl til Medier24.

Egseth: «Ble feil»

Sidan har fleire etterlyst svar frå Egseth på Twitter, og Kihl la søndag ut ei Facebook-oppdatering kor han mellom anna skriv at han «liker skikkeleg dårleg når politikarane prøver å lure oss».

Peder Weidemann Egseth i samtale med Høgre sin generalsekretær John-Ragnar Aarset.

Egseth har ikkje svart kritikken som har kome i sosiale medier.

Medier24 har gjentekne gongar forsøkt å intervjue Egseth om saka, men han ynskjer ikkje å bidra med meir enn følgjande sms:

«I sin tale takket Kallmyr alle som bidro under andre verdenskrig. Kallmyr har også flere ganger sagt at det inkluderte Sovjet. At jeg har forsøkt å lure noen er å dra det veldig langt, men at jeg gikk litt hardt ut fra start, er nok sant. Det ble feil og derfor ringte jeg Jens søndag.»

Kihl meiner Egseth burde ha beklaga offentleg.

– Eg veit ikkje om SMK (Statsministerens kontor) har hatt tilgang til talen dei har snakka om eller ikkje, men dei har uansett vore for kjappe i svingane. Eg meiner regjeringa burde kome opp med eit betre svar, seier han.

Kihl viser òg til Erna Solberg sine skiftande forklaringar i etterkant av Kallmyr-talen.

– Oppteken av eit ryddig forhold

Jens Kihl, kommentator i Bergens Tidende.

Kihl legg til:

– På same måte som me i media innrømmer feil når me bommar, meiner eg òg at politikarar burde vore vaksne nok til å gjere det same. Det er lov å gjere feil, men eg tykkjer ein skal gjere opp for seg.

– For dei som har danna seg eit bilete av at eg er ein venstrevridd journalist som er ute etter å diskreditere regjeringa, så heng skuldinga der framleis. Om Egseth berre seier at dette vart feil, og at dei bomma, så løyser det problemet.

BT-kommentatoren, som tidlegare har fartstid som SV-politikar og Klassekampen-journalist, er oppteken av eit godt forhold til politikarane, og tykkjer dei burde vere det same.

– Eg er oppteken av eit godt og ryddig forhold til politisk leiing på SMK, men eg tykkjer òg dei burde vere opptekne av det den andre vegen. Når ein har tabba seg ut, kan ein seie det – og gå vidare.