Store sprik i juletillegget. Så mykje får seks ulike medier betalt for å jobbe 1. juledag

Jul betyr for mange høgtid, god mat, familiekos – og fri frå jobben.

For nokre betyr det derimot jobb og nyheitsformidling. Men kor godt får dei betalt for å gå glipp av late dagar, familieselskap og julemat?

Variasjonane er store, viser eit tilfeldig knippe mediehus Medier24 har vore i kontakt med.

– Eg jobbar ofte sjølv i jula, og skal jobbe første juledag, seier klubbleiar i VG, Tor-Erling Thømt Ruud, til Medier24. 

I tillegg til vanleg timebetaling, vil Thømt Ruud få eit tillegg på om lag 6.700 kroner for vakta første juledag.

Hos Bergens Tidende, som òg er eigd av Schibsted, ser det litt annleis ut. Der får dei, i samsvar med Journalistavtalen, eit ulempetillegg på 1.003 kroner, i tillegg til eit timetillegg på 193 kroner.

Tillegg første juledag:

• VG: 300,- i morgontillegg, 2000,- i kompensasjon for heilagdag, 550 kroner i timetillegg. 
• TV 2: 2.307,- i ulempetillegg
• Dagbladet: 683,- i timetillegg.
• Bergens Tidende: 1.003,- i ulempetillegg, 193,- i timetillegg.
• Tønsbergs Blad: 1.003,- i ulempetillegg, 70 % av lønn i timetillegg.
• Sunnmørsposten: 1.003,- i ulempetillegg, 1.500,- i lokalt tillegg.

Kjelde: Klubbleiarane i dei ulike mediehusa.

– Eit viktig gode

Også i Tønsbergs Blad er det Journalistavtalen som er gjeldande.

– Ikkje noko ekstra utover det, seier klubbleiar Lars Døvle Larssen til Medier24.

– Det har vore usemje rundt tolkinga av lokalavtalen mellom klubben og leiinga. Utover det er me nøgd med å ha overtidsgodtgjersle på alt arbeid som fell på raude dagar. Det er eit viktig gode, seier han vidare.

Sjølv har han fri og skal nytte jula til avslapping.

– Går greitt

Ein som ikkje har fri i jula, er reporter i TV 2, Leslie Tangen, som i tillegg er nestleiar i TV 2-klubben.

– Eg skal jobbe heile jula. Frå julaftan til sjette juledag, seier han til Medier24.

– Det er for så vidt frivillig, for eg hadde så lang fri i fjor. For meg går det greitt. Me på Nyhetskanalen byrjar så tidleg, kl. 06, så er me ferdige kl. 14. Då får ein masse av dagen. Så det går fint – bortsett frå at eg vert stuptrøytt, seier han.

Problematisk frilansbruk

Når Medier24 tek kontakt med klubbleiar i Sunnmørsposten, Eirik Meling, fortel han om nyleg gjennomførte forhandlingar mellom tillitsvalde og leiing.

– Me vedtok i klubbmøtet å gå med på at det vert innført ein ny turnus for arbeid på heilagdagar. Dette arbeidet har i stor grad blitt utført av frilansarar fram til no, seier han til Medier24.

Han utdjupar:

– Sidan me i fleire år i hovudsak har hatt fri på heilagdagar så er ikkje innføringa av turnusen spesielt populær. I samband med nedbemanningar dei siste åra så har arbeidspresset blitt høgare, og meir heilagdagsjobbing verst sett på som ytterlegare auka belastning. Heilagdagsgode er eit gode me har sett stor pris på. Når me først skal ha ein heilagdagsturnus så er avtalen me no har kommen fram til heilt ok. Me skulle gjerne hatt høgare heilagdagstillegg lokalt. Ein fordel er at me kan avspasere etter arbeid på heilagdagar, òg dei som fell på måndag til fredag, men i dei høva får me ikkje det lokale tillegget på 1.500 kroner.

– Ser de på frilansbruken som problematisk?

– Som klubb er det klart at me har sett på frilansbruken som problematisk, faste tilsette skal som hovudregel gjere jobben hos oss. Det har likevel vore valet mellom to vonde. Auka belastning for dei faste tilsette, eller bruk av frilansarar.