«Godt for landet», skreiv Dagbladet-kommentator om vegkaos i vest. Då såg bergenseliten raudt

Tysdag fekk kommentator og politisk redaktør Geir Ramnefjell i Dagbladet kjenna ekta vestlandsvêr på kroppen etter sin kommentar om vegkaoset i Bergen.

«E39 må stenges og folk oppfordres til å ta båt til Bergen. Det er en dårlig dag for vestlandshovedstaden, men en god dag for landet», skreiv Ramnefjell – og tok vidare fatt på debatten om milliardprosjektet ferjefri E39.

– Dette trur eg er den dummaste og mest malplasserte kommentaren eg har lese. Makan, twitra byrådsleiar Roger Valhammer (Ap) i Bergen onsdag kveld.

– Fuck Oslo

Alt då hadde Bergens Tidende-kommentatorane Jens Kihl, Morten Myksvoll og Hans Kristian Mjelva kritisert innlegget på Facebook.

– Sat og skreiv på ein kommentar om Oslo-pressas kampanje-journalistikk mot ferjefri E39, så takk til Geir Ramnefjell. Dette blir gøy, skreiv Mjelva under Kihl sin Facebook-status, kor Kihl proklamerte at kommentaren er noko av det dummaste han har lese på ei stund.

– Det er på tide at folk i Oslo får augene opp for kva E39 faktisk er. Då lirar dei kanskje ikkje av seg sånt svada som i den kommentaren. Herregud, twitra Myksvoll.

Også statssekretær Jens Frølich Holte i Utanriksdepartementet, Magnus B. Nygaard i NHO Vestlandet, Try-rådgjevar og tidlegare TV 2- og Bergens Tidende-kommentator Mathias Fischer og kommunikasjonsdirektør Krister Hoaas i Lerøy Seafood var ute og harselerte.

– Herregud. Fuck Oslo, skreiv Fischer.

– Tenk å få skriva kommentarar om ting ein openbert har så lite kunnskap om, repliserte Hoaas, som tidlegare har jobba som politisk journalist i Bergens Tidende.

58 evakuert

Tysdag morgon oppstod det trafikkaos då E39 vart stengd inn mot Bergen etter ein massiv vasslekkasje. 750.000 liter vatn lekkja ut, Bergen si einaste innfartsåre frå nord var stengt ut dagen og 58 personar vart evakuert.

Byrådsleiar Valhammer utdjupar overfor Medier24:

– Det er malplassert å skriva at dette er ein god dag for landet når 58 personar vart evakuert, trafikken stogga i eit døgn, Sandviken sjukehus måtte få ein mann køyrd til seg og ambulansen fekk problem med trafikken.

– Her meiner eg Dagbladet bommar totalt. Sjølv MDG i byen – som er mot ferjefri E39 – reagerer kraftig, legg han til.

Ramnefjell i Dagbaldet ynskjer å svara på kritikken per e-post, og skriv mellom anna til Medier24:

«Samme dagen som NRK meldte at folk ble anbefalt å ta båt inn til Bergen fordi E39 var stengt, annonserte Venstre at de vil vrake prestisjeprosjektet fergefri E39. Jeg brukte det som inngang til en kommentar for å illustrere hvorfor båt er en naturlig løsning for transport langs kysten vår, og hvorfor det å insistere på fergefri vei er en dårlig idé.» 

• Les heile tilsvaret nedst i saka.

– Må setja seg inn i forholda

Valhammer meiner vidare at onsdagens trafikktrøbbel hadde lite å gjera med fjordkryssing på E39.

– E39 i Bergen har ingenting med fjordkryssing å gjera. Utfordringa her er at me manglar ein alternativ ringveg frå nordaust, at me kan leia trafikken utanfor sentrum og at me ikkje har fått Bybane til Åsane, seier Ap-politikaren.

Han understrekar at Ramnefjell er ein kommentator han les med stor interesse, og at han set pris på at riksaviser engasjerer seg i samferdslepolitikk på Vestlandet.

– Men då må dei setja seg inn i dei faktiske forhold, seier Valhammer.

Slik svarar han på kritikken:

I ein e-post til Medier24 skriv Ramnefjell:

«Dette fungerte dårlig i Bergen, åpenbart.

Samme dagen som NRK meldte at folk ble anbefalt å ta båt inn til Bergen fordi E39 var stengt, annonserte Venstre at de vil vrake prestisjeprosjektet fergefri E39. Jeg brukte det som inngang til en kommentar for å illustrere hvorfor båt er en naturlig løsning for transport langs kysten vår, og hvorfor det å insistere på fergefri vei er en dårlig idé. Kostnadene for prestisjeprosjektet har økt fra 150 til 340 milliarder. Selv den summen er Vegvesenet nå usikker på, og de vil derfor gjennomgå alle prosjektene på nytt for å vurdere om fergetransport kan være en bedre løsning.

Kritikken mot fergefri E39 begynner altså å bygge seg opp, og det mener jeg er bra. Hvis prinsippet om null ferger langs E39 skrotes, vil det være godt for landet. Det er ikke bare på grunn av pris og geografi, men også på grunn av Norges klimasatsing. Fergeanbud kan være en helt avgjørende faktor for at Norge skal lykkes med å bygge en konkurransedyktig næring innenfor grønn skipsfart, som er et strategisk viktig prosjekt for å kutte utslipp og skape arbeidsplasser – noe jeg også påpekte i min kommentar.

I min iver etter å sette disse poengene på dagsorden, trakk jeg inn kaoset på E39 i Bergen og oppfordringen om å ta båt.»