Nicolai Tangen, ny sjef i Oljefondet, Statens pensjonsfond. Til høgre er nyheitsredaktør Tora Bakke Håndlykken i VG.

Nina E. Rangøy / NTB scanpix og Berit Roald / NTB scanpix

VG sa nei til Tangen-kontrakt med sperrefrist. Det fekk konsekvensar

– Ville vore feil overfor lesarane å sitja på kontrakten utan å publisera den, meiner VG-redaktør. Då gjorde Norges Bank heilomvending.

Publisert 28.05.2020 - 13:04

Denne artikkelen er over to år gammel.

Torsdag føremiddag meldte NTB at Norges Bank offentleggjer påtroppande Oljefond-sjef Nicolai Tangen som arbeidsavtale klokka 12.

I Norges Bank sin invitasjon til pressekonferansen, fortalde dei sa media ville få tilgang til avtalen slik 30 minuttar før for å førebu seg til pressekonferansen klokka 12.

Det sa VG nei til, og dermed måtte også alle andre redaksjonar venta til offentleggjeringa for å få tilgang til avtalen.

Potensiell konfliktsituasjon

– Det var nok med gode intensjonar frå Norges Bank, men i ei sak med så stort offentleg interesse ville me kunne jobba journalistisk med den når me får den, for å få ut informasjon. Det er vår forplikting overfor lesarane, seier Tora Bakke Håndlykken, nyheitsredakrør i VG, til Medier24, og legg til:

Nyheitsredaktør Tora Bakke Håndlykken i VG.

– I utgangspunktet er me ikkje veldig glad i sperrefristar, men me vurderer det frå tilfelle til tilfelle. I dette tilfellet meiner me det ville vore feil overfor lesarane. Det er ryddigare å publisera ting så fort me får tak i informasjonen. Me kunne ha hamna i ein konfliktsituasjon ved å ha fått tilgang til avtalen med journalistisk jobbing.

Difor snudde Norges Bank

Bård Ove Molberg, presseansvarleg i Norges Bank, stadfestar overfor Medier24 at VG si avgjersle fekk dei til å snu.

«Vi hadde lagt opp til å dele ut dokumentene m sperrefrist kl 11.30 for å gi de fremmøtte journalistene best mulig arbeidsforhold. Dette er noe vi har lange tradisjoner for i Norges Bank, og fordi vi har et godt etablert tillitsforhold med journalistene som følger oss», skriv Bård Ove Molberg, presseansvarleg i Norges Bank, til Medier24.

Vidare skriv han:

«Da VG i formiddag varslet at de ikke ville respektere sperrefristen, fikk det den konsekvensen at ingen av de fremmøtte journalistene fikk utdelt dokumentene før rett før pressekonferansen startet», skriv han vidare.

Ikkje tilhengjar av sperrefristar

Redaksjonssjef Jan Thomas Holmlund i Dagbladet er ordknapp når Medier24 slår på tråden for å høyra korleis dei vurderte tilbodet om sperrefrist.

– Det må vera opp til Norges Bank om korleis dei steller seg til sperrefrist. Dagbladet kommenterer ikkje interne publisistiske vurderingar, seier han.

NTB sin nyheitsredaktør, Sarah Sørheim, fortel at dei aldri rakk å ta eit standpunkt om dei ville godta sperrefristen eller ei.

– Me tok aldri ei konkret vurdering. Me har forstått det slik at Norges Bank gjer dette jamleg, men tidlegare har det ikkje vore like problematisk då det aldri har vore den type medieinteresse. På generelt grunnlag er me ikkje tilhengjar av sperrefristar, seier ho.