VG-redaktøren opnar opp: Slik har dei gjenreist tilliten etter skandale­året

– Det var ikkje behov for å gjera ei stor opprydding. Me hadde ingen stor ukultur. Saka var ikkje representativ for vår journalistikk – men det var ein alvorleg feil, og når eit medium som VG gjer ein så stor feil, får det enormt med merksemd, og det påverkar tilliten.

Det seier sjefredaktør og administrerande direktør Gard Steiro til Medier24 når han snakkar om arbeidet med å reise tilliten til avisa. Den siste tillitsundersøkinga frå Medietilsynet viser nemleg at VG har klatra frå 32 til 42 prosent på eit halvt år.

– Saka var ekstraordinær

Det har gått akkurat eitt år og ei veke sidan TV 2 publiserte saka om korleis Sofie Bakkemyr følte seg overkøyrd av landets største avis. Umiddelbart falt tilliten til avisa ned til 30 prosent ifølgje Medietilsynet si måling.

I september, nokre veker etter at avisa vart felt i PFU, var tilliten stadig nede på 32 prosent. No er tilliten til VG omtrent det same som for eit år sidan, då den var på 43 prosent.

– Alle som jobbar i VG visste at Bar Vulkan-saka ikkje er representativ for journalistikken me leverer. Den var ekstraordinær, og me visste ei slik sak ville påverka tilliten vår – men alle hadde god sjølvtillit på at me byggjer den opp igjen, seier Steiro.

– Me er dei mest opne

Nøkkelen har vore openheit, ifølgje Steiro. Heilt sidan krisa trefte dei i fjor, har avisa vore opptekne av å visa fram feil, og vera tydelege på korleis dei skal unngå at liknande skjer igjen. Det første dei gjorde, som tok ei lang veke, var å leggja fram ein intern granskingsrapport om Bar Vulkan-saka.

Så kom det ein rettelogg, kor alle korrigeringar blir lagt ut på ei samleside.

Deretter oppdaterte dei avisa sine interne husreglar, som alle kan lesa på VG.no.

I november gjekk til og med Steiro ut i ein kommentar med at VG rettar feil i tre nye artiklar om Trond Giske.

– Me meiner me no er dei mest opne i heile Medie-Norge om feila me gjer, saman med Faktisk.no. Der meiner eg me har teke eit stort steg, seier Steiro.

Auken i tillit til VG såg dei sjølv på interne målingar gjennom heile fjoråret, ifølgje Steiro. Månadleg gjennomfører YouGov målingar på fleire ulike parameter for avisa.

Midt i eit resonnement stiller likevel Steiro seg spørsmålet sjølv: Er dei nøgd med å liggja på 42 prosent – eit hav bak til dømes NRK1 (83 %) og TV 2 (70 %)?

– Nei, det er me kanskje ikkje, men VG er ei avis med ein innhaldsmiks som gjer at me aldri vil liggja på nivå med NRK fordi me er eit anna type medium.

Vill vekst i koronaens tid

Under koronakrisa har VG opplevd ein massiv trafikkvekst. Heilt sidan pandemien nådde Norge har redaksjonen jobba systematisk med nyheiter og visualisering av korleis dette påverkar nordmenn.

For ti dagar sidan melde avisa om historisk trafikkrekord, med 69 millionar sidevisingar den 12. mars, dagen regjeringa innførte dei strengaste beredskapstiltaka i fredstid.

– Me opplever nok ein tillitsauke no fordi VG i slike situasjonar er på sitt aller beste. Me er flink på å dekkja denne type hendingar med løpande nyheiter, god formidling av statistikk og tal, samstundes som me har eksklusive nyheiter.

– No går deler av redaksjonen rundt med «Make breaking great again»-capsar. Kvifor måtte ein gjera breaking «great again»? Var sjølvtilliten i VG svekkja etter våren i fjor?

– Det var ikkje dårleg sjølvtillit i VG-redaksjonen, men me gjorde ei omorganisering i fjor haust. Då ynskja me å organisera breaking endå tydlegare, og styrka kompetansen inn i breaking-miljøet.

– Korleis var det å driva avis for VG etter det som skjedde i fjor? Ville de fått til det de gjer no, i fjor?

– Eg trur me hadde fått til det same. Kulturen i VG er sterk, så eg trur me ville fått til det same også i fjor haust, men i fjor vår var ein tung periode for heile VG-redaksjonen. Denne saka var vond og vanskeleg for oss, det er vanskeleg å stå i ein slik storm og det er vanskeleg når me har gjort ein feil.

Også VG, som alle andre aviser, lagar avis med store deler av redaksjonen på heimekontor. Også Steiro jobbar heimanfrå, lange dagar, og innrømmer at situasjonen er uvant.

– Det vert opplevd som uverkeleg. Samstundes har eg aldri opplevd jobben som meir meiningsfylt og at det eg held på med er viktigare enn no. Eg har aldri vore meir stolt over avisa enn dei to siste vekene.