Eirik Mosveen bryt tausheita etter VG-skandalen: – Eg hadde ikkje noko med Bar Vulkan-saka å gjera

No tek nyheitsredaktør Tora Bakke Håndlykken i VG sjølvkritikk for å ikkje ha presisert at Eirik Mosveen ikkje var involvert.

Publisert 30.08.2019 - 14:47

Denne artikkelen er over to år gammel.

Det skapte rabalder i VG då Sofie sto fram på TV 2 og fortalde om den mykje omtalte dansevideoen med Trond Giske på Bar Vulkan og sitt møte med VG og journalist Lars Joakim Skarvøy.

Saka fekk store konsekvensar, avisa la fram ein ekstern evalueringsrapport og Skarvøy fekk løna permisjon i seks månadar. Dei to andre journalistane som hadde byline på saka, Marie Melgård og Eirik Mosveen, forlét begge politisk gruppe til fordel for høvesvis utanriks- og Dagsorden-avdelinga.

No tek nyheitsredaktør Tora Bakke Håndlykken sjølvkritikk for rapporten, og presiserer at Mosveen aldri var involvert i saka.

– Riktig tidspunkt å gå tilbake

Som Medier24 tidlegare har skrive, var Mosveen berre lånt ut frå Dagsorden til politisk gruppe. No fortel han at skiftet var frivillig.

– At eg skulle tilbake til Dagsorden var heile tida planen frå mi og VG si side. Då eg forstod det ville bli mykje merksemd rundt denne saka, med moglege endringar, skjønte eg at dette var det riktige tidspunktet å gå tilbake, seier Mosveen til Medier24.

Han legg til:

– Eg ynskjer likevel på ingen som helst måte å ta avstand til Melgård eller Skarvøy.

– Eg var lånt ut til politisk gruppe sidan veka før valet i 2017, og skulle i utgangspunktet berre vera der til valet var over. Det skjedde derimot så mykje i norsk politikk, at det tok lenger tid enn planlagd, legg han til.

Mosveen ynskjer ikkje å kommentere sjølve Giske-saka. Han presiserer likevel at han ikkje hadde noko med den mykje omtalte artikkelen å gjera, då han var på ferie. Mosveen hadde byline i saka fordi hadde arbeidd med Trond Giske-saker før han tok ferie og på grunn av VG sine rause byline-reglar.

Saka og evalueringsrapporten var onsdag oppe i Pressens Faglege Utval, og vart felt på fem punkt på Ver Varsam-plakaten.

Skarvøy er, etter det Medier24 kjenner til, tilbake i VG 24. september. Det er enno ikkje teke stilling til kva rolle eller avdeling han skal inn i.

Kan framleis skrive om politikk

Nyheitsredaktør Tora Bakke Håndlykken i VG tek sjølvkritikk på at det faktumet burde vore endå tydlegare presisert i evalueringsrapporten.

– Han var derimot ikkje til stades i redaksjonen då Bar Vulkan-saka vart skriven og jobba følgjeleg ikkje med den, fordi han hadde ferie. Dette kom ikkje fram eksplisitt i evalueringsrapporten, slik det burde, og har heller ikkje kome tydeleg nok fram i den etterfølgande medieomtalen av saka, seier Håndlykken til Medier24, i forståing med Mosveen.

Ho utelukkar ikkje at Mosveen kan skrive om politikk.

Sjefredaktør Gard Steiro og nyheitsredaktør Tora Bakke Håndlykken i VG i PFU-møtet.

– Mosveen jobbar òg med nyheitssaker innan det politiske stoffområdet når det er naturleg, og har ikkje noko forbod mot å skrive om politiske saker – slik det er mogleg å få inntrykk av gjennom mediedekninga av denne saka, seier ho.

Mosveen er glad for at det no vert presisert frå avisa sitt hald.

– Eg er nøgd med at VG-leiinga seier klart og tydeleg frå om at eg ikkje har noko med denne saka å gjera. Det har vore det etterlatne inntrykket – fordi det motsette ikkje er blitt sagt, seier han.

Glad for å vere tilbake

Mosveen forklarar vidare at han er glad for å vere tilbake i Dagsorden-avdelinga, kor han opphavleg var lånt ut frå.

– Det var aldri meininga å bli så lenge, men det er jo berre å sjå på kor mykje som skjedde i norsk politikk etter førre stortingsval.

– Du var der i halvanna år lenger enn planlagd. Var det gøy?

– Absolutt. Eg byrja først å skrive om politikk i VG i 1995, og har sidan vore av og på. Eg har mellom anna vore leiar av politisk gruppe, USA-korrespondent, politisk kommentator og leiarskribent – så eg har hatt mange roller.

At han skulle tilbake til Dagsorden var likevel heile tida planen, ifølgje han og VG.

– Eirik Mosveen har etter eige ynskje gått tilbake til Dagsorden-avdelinga. Der jobbar han òg mellom anna med politisk journalistikk, men altså på større undersøkande prosjekt. No jobbar han mellom anna med VG si avsløring rundt samhandlingsreforma og oppfølginga av døyande eldre, seier Håndlykken.