Sandberg og Letnes i løvenes hule: Spiste lutefisk med Fiskeribladet-redaktøren

Då Vestafjelske Redaktørforeining haldt sitt årlege lutefisklag i helga var fiskeriminister Per Sandberg invitert til den faglege delen av arrangementet.

Her skulle den tidlegare Frp-nestleiaren fortelje om korleis han opplevde media si dekning av stormen han sto i denne sommaren.

Kritikken som kom i etterkant av hans Iran-reise førte til at han gjekk av som både fiskeriminister og nestleiar i partiet, og temperaturnivået nådde nye høgder då trønderen tok eit knallhardt oppgjer med media på eit pressetreff under Arendalsuka.

Positiv redaktør

På redaktørmøtet i helga fekk han mellom anna snakka ut med Fiskeribladet-redaktør Øystein Hage, som han tidlegare har krangla heftig med, om dekninga av hans Iran-reiser og forhold til Bahareh Letnes.

– Me vart einige om å vere ueinige. Det har aldri vore noko personleg, men meir ein universell kritikk, frå mi side, seier Per Sandberg til Medier24.

Bergensavisen omtalte saka først.

Fiskeribladet vart felt av Pressens Faglige Utvalg på to punkt i dekninga av Sandberg si Iran-reise tidlegare i år. Det var Sandberg si dotter, Charlotte Sandberg, som melde avisa inn til PFU, og den tidlegare fiskeriministeren har i ettertid vore open for å saksøkje avisa kor Hage er redaktør.

No har dei skværa opp, ifølgje Hage.

– Eg tykkjer det var veldig ok. Han fekk sagt det han tenkte og meinte om oss, og norske medier, og korleis ting har blitt dekka. I tillegg fekk eg sagt korleis me har tenkt. Fiskeribladet vart felt for to saker, så me fekk snakka litt rundt det. Eg tykkjer det var eit bra møte, seier han til Medier24.

Droppar truleg søksmål

– Skal du saksøkje Fiskeribladet, Sandberg?

– No handlar det om kor mykje overskot og ressursar ein har. Bahareh og eg tenkjer veldig framover, seier han, og hintar med det om at det ikkje vert noko rettssak mellom han og Fiskeribladet.

Det er Hage nøgd med.

– Eg ser ikkje føre meg kva han skulle ha saksøkt oss for, men det sparar oss iallfall for tid- og ressursbruk, seier han.

– Pingpong og skyting i debattstudio

I etterkant av Fiskeribladet-oppslaga om Sandberg og Letnes sende òg Frp-politikaren ei Facebook-melding til Hage kor han avslutta med «Karma vil bite dere bak, vær trygg.» Meldinga skapte sterke reaksjonar, men via kommunikasjonssjef i Nærings- og fiskeridepartementet, Martine Røiseland, forklarte Sandberg det slik:

– Dette var aldri meint som ein trussel, men uttrykk for min frustrasjon.

I slutten av oktober var Sandberg og Fiskeribladet tema i NRK-programmet Dagsnytt 18, og dei to diskuterte då dei ulike sakene kor Fiskeribladet vart felt av PFU.

– Då vart det meir pingpong og skyting mot kvarandre. No var det veldig bra med ein «tjomsleg» og hyggjeleg tone, seier Hage.

– Ein får lufta ut

Sandberg meiner ein burde hatt fleire møter mellom media og politikarar.

– Me burde hatt fleire sånne type møter, med journalistar, i dette tilfellet med Vestafjelske redaktørforeininga. Me fekk lufta ut og diskutert. Det er positivt fordi me får prata direkte til kvarandre, og ikkje gjennom avisene. Så får me kritisere og diskutere det me er ueinige i. Ein får lufta ut, og vere klar og tydeleg i sine meiningar. Alle slike møter er positive. Det trur eg journalistane og redaktørforeininga òg tykkjer.

Hage fortel til Medier24 at han forstår det må ha vore vanskelege tider for Sandberg, og set pris på ein uformell prat «off record».

– Det er veldig bra at personar som har stått i media får høyre korleis me har tenkt. Eg fortalde litt om korleis me trakk historia tilbake til ein Iran-tur i 2016. Bakgrunnen for at me interesserte oss for dette var at Sjømatrådet stoppa Iran-satsinga, som hadde gått på trynet. Det er ein raud tråd i dette, og me hoppa ikkje berre på noko, seier han vidare.