ARKIV: I 2003 stakk VG av med SKUP-prisen med Lucia-saka. Her ved Rolf Widerøe og Tor Strand (t.v.) saman med leiaren for SKUP-juryen, Britt Tangen.

Anita Arntzen / SKUP / SCANPIX

Dette har ikkje skjedd på Skup sidan 2002

Berre riksmedia vart heidra under Skup 2020. – Eit tankekors, seier lokalavisredaktør.

Ole Alexander Saue

Publisert 27.04.2020 - 13:30

Denne artikkelen er over to år gammel.

Laurdag vart Skup-prisen for beste gravejournalistikk i 2019 delt ut digitalt. Medan VG stakk av med hovudprisen, fekk NRK, TV 2 og Dagbladet diplom.

Dermed var det ingen lokale eller regionale redaksjonar som vart heidra laurdag. Det har ikkje skjedd sidan 2002, då Kapital vann prisen og NRK, TV 2, Dagens Næringsliv og Dagbladet fekk diplom.

– Skup-prisen er blitt til ein konkurranse mellom dei største og mest ressurssterke redaksjonane, som i all hovudsak er i Oslo, medan regionavisene i blant nappar til seg eit diplom, seier sjefredaktør Jan-Eirik Hanssen i Avisa Nordland til Medier24.

Ikkje overraska

Sjølv sende hans redaksjon inn metoderapport for deira arbeid med «Jenta ingen kan hjelpe». Saka vann Svarte Natta-prisen og den interne Amedia-prisen i fjor.

– Eg er ikkje veldig overraska over at riksmedia dominerer årets utdeling heller. Det var veldig verdige vinnarar, og mange gode bidrag vart ikkje premiert.

Jan-Eirik Hanssen, redaktør i Avisa Nordland.

Han understrekar at dei ikkje hadde veldig store forventningar til sin kandidat, og at dei ikkje er skuffa – sjølv om også dei hadde eit lite håp om å bli heidra med diplom.

Av dei 44 innsende rapportane i år, kom 13 frå lokale media, inkludert to regionale NRK-kontor.

Sett bort frå Tønsberg Blad sin diplom i 2019, må ein tilbake til 2010 for å finna sist ei lokalavis fekk heider og ære under konferansen. Også då var det Tønsberg Blad som fekk diplom.

– Det er eit tankekors for alle oss at både mangfaldet og ryggrada i norsk medieflora – lokalavisene – knapt vert premiert av Skup. Me må reflektera litt over kvifor det er slik. Journalistikken har utvikla seg, dei store redaksjonane har vore flinke til å utvikla god metodikk, og det vert brukt stadig meir ressursar på det.

Han trur at Skup-prisen er noko lokalaviser ikkje steller seg til, men at dei heller satsar på regionale prisar og og interne konsernprisar.

– Skup-prisen har blitt for krevjande å nå opp på, og då risikerer ein at lokale medium ikkje sender inn kandidatar. Det vil vera eit tap både for lokalavisene og Skup.

– Utelukkande faglege vurderingar

At Skup-prisen er dominert av riksmedia er ikkje nytt. Det viser mellom anna Skup-tabellen Medier24 laga i fjor.

Skup-prisar til lokale og regionale medium:

Bergens Tidende: 2 (prisar) + 7 (diplom)
Fremover: 1 (pris) + 1 (diplom)
Adresseavisen: 5 diplom
Tønsbergs Blad: 3 diplom
Nordlands Framtid: 2 diplom
Nordlandsposten: 2 diplom
Hamar Dagblad: 1 diplom
Glåmdalen: 1 diplom
Firdaposten: 1 diplom
NRK Hordaland: 1 diplom
Østlands-Posten: 1 diplom
NRK Bodø: 1 diplom
Drammens Tidende: 1 diplom
Hamar Arbeiderblad: 1 diplom
Sydvesten: 1 diplom
Østlandets Blad: 1 diplom
Bergensavisen: 1 diplom
Næravisa: 1 diplom

Juryleiar Bernt Olufsen i Skup er tydeleg på at det er redaksjonane som legg størst ressursar i undersøkande journalistikk som vinn risar. Han trur det speler ei stor rolle at dei mellom anna har eigne avdelingar for graving.

– Juryen les metoderapportane frå små redaksjonar, like nøyaktig som dei store. Me har utelukkande eit fagleg perspektiv på våre vurderingar – uavhengig av kva ressursar som er stilt til disposisjon, seier han.

– Det kan like godt vera at ny og spektakulær metode vert nytta i eit lokalt- som eit riksmedium. Det er opp til den enkelte journalist og redaksjon sin kreativitet.

Betre vilkår for lokalpressa

No meiner derimot Olufsen at det meir enn før vert satsa på undersøkande journalistikk ute i distrikta.

– Amedia har ei eiga ordning for gravestipend, Fritt Ord støttar i stigande grad lokale medium sin undersøkande journalistikk, og det er også etablert eit Senter for undersøkande journalistikk, som støttar lokale graveprosjekt.

– Vilkåra for lokale medium for å satsa på graveprosjekt er no sterkare enn dei noko sinne har vore. Det vil vera heilt kritisk for den lokale journalistikken også inneber auka satsing på undersøkande journalistikk.