Volda-tilsette i hemmeleg rapport: «Eg har aldri vore i eit så dårleg arbeidsmiljø»

Ei arbeidsmiljøundersøking (ARK) gjennomført ved Høgskulen i Volda i november i fjor avslørte stor misnøye blant dei 50 tilsette ved Avdeling for mediefag på skulen.

Då Avdeling for mediefag sa seg betydeleg meir samd i at jobben påverka helsa negativt enn resten av skulen, bestilte skulen ein ny rapport for å følgje opp funna.

I den hemmelegstempla rapporten utarbeidd av Stamina kjem det fram at fleire opplever arbeidsmiljøet som «uhaldbart», «energitappande», «elendig» og «slitsamt».

I ARK-undersøkinga kom det i tillegg fram at om lag halvparten av dei tilsette var misnøgd med dekan Audhild Gregoriusdotter Rotevatn. Medier24 har fått innsyn i begge rapportane.

• Medier24 har gjentekne gongar forsøkt å få ein kommentar til saka av Rotevatn og hennar advokat Tore Lerheim. Ingen av dei ynskjer å kommentera saka.

«Nesten halvparten av dei tilsette seier dei er helsemessig påverka i negativ retning og/eller har vurdert å finne seg ny jobb utanfor HVO», heiter det i Stamina-rapporten.

«Energitappande»

I Stamina-rapporten kjem det fram sterk misnøye mot leiinga ved avdelinga.

Andre går ikkje like langt, men meiner det er utfordrande, og spesielt knyt til kommunikasjon, prioriteringar, lojalitet, og «uryddige konflikthandteringsprosessar».

I alt vart 50 personar intervjua i ein halvtime eller meir om korleis dei tolka situasjonen. Her er nokre av skildringane frå arbeidsmiljøet:

• «Eg har aldri vore i eit så dårleg arbeidsmiljø»
• «Det generelle arbeidsmiljøet er elendig»
• «Opplever at situasjonen er alvorleg. Klump i magen, kva er det neste som skjer?»
• «Det er slitsomt å vere i miljøet. Har det til langt opp i halsen. Energitappande»
• «Der er mange som opplever dette som ein stor del av livet, mange ligger våkne om natta»
• «Det å gå i den sure stemninga er uholdbart» 
• «Det har lagt seg eit teppe over avdelinga siste par åra som gjer at folk har mista frimodigheita. Folk er i negativt sinnsleie, det er dårleg stemning»
• «No ønsker folk å vere minst mogleg synlige»

Medier24 har denne veka vore i dialog med ei lang rekkje kjelder som kjenner seg att i det dårlege arbeidsmiljøet.

– Var du klar over situasjonen før rapporten kom?

– Nei, svarar rektor Johann Roppen.

– Eg hadde høyrd enkeltutsegn, og eg visste nokre var misnøgd. Slik er det dei fleste plassar. Dimensjonen på det forstod eg ikkje før Stamina-rapporten kom, seier Roppen til Medier24.

– Det er alvorleg. Det mest alvorlege er konklusjonen om at arbeidsmiljøet ikkje er fullt ut forsvarleg, seier rektor Roppen til Medier24.

– Korleis er stemninga på høgskulen i dag?

– Det er ei sak som mange av oss har jobba med gjennom sommaren, så det har sett sterkt preg på kvardagen, seier han.

«Negativitet, uro og utrygghet»

Tilsette seier i tillegg at konfliktnivået er høgt, fraksjonert og nesten alle tilsette seier dei opplever spenningar i arbeidsmiljøet.

«Det er mykje negativitet, uro og utrygghet», heiter det frå ei kjelde i Stamina-rapporten.

Måndag vart det kjent at styret ved høgskulen hadde ekstraordinært styremøte etter den interne uroa i avdelinga. Tillitsvald Erling Sivertsen stadfesta overfor Medier24 at dei ynskja ny dekan.

Styret opplyste i ei pressemelding om at det skal jobbast vidare med saka, og dosent Odd Ragnar Hunnes er allereie spurd om å ta over jobben.

Skuleleiinga har òg opna for å omplassera Rotevatn med tvang og gi ho nye arbeidsoppgåver.

«Konfliktar stel energi og tid»

I rapporten vert det spesielt peikt på motstand mot endringar ved avdelinga, og at endringane ikkje har vore tilstrekkeleg forankra i miljøet.

Over halvparten er undrande til lojaliteten til Rotevatn, «då ho er så lite synleg for dei tilsette ho skal leie», ifølgje rapporten. Tilsette opplever at ho er meir retta mot sentralleiinga ved HVO, framfor avdelinga internt. Ho skal i tillegg ha vore lite lydhøyr for innspel frå dei tilsette.

«Det har liten verdi å kome med innspel, dekan har oftast bestemt seg på førehand», vert det kommentert av ein tilsett.

«Dekan burde gått saktare fram, bygge konsensus i større grad, bruke meir tid. Ein må jobbe seg til tillit, dette tek tid. Ho må ta omsyn til etablert kultur og finne ein middelveg», er ein annan kommentar.

Over halvparten meiner det er uløyste konfliktar i arbeidsmiljøet som pregar situasjonen i stor grad. I tillegg står det i rapporten at om lag halvparten av dei tilsette ikkje ser at arbeidsmiljøet kan endrast til det betre med noverande dekan «ved roret».

– Dette må me bruka tid på, og me må få ein ny dekan. Eg vil helst ha ein frå eigne rekkjer. Rotevatn kom utanfrå, og hadde ikkje særleg akademisk bakgrunn i forhold til mange av dei som jobba der frå før. Dei hadde kanskje venta ei annan handtering av det faglege, seier tillitsvald for dei tilsette ved avdelinga for mediefag, Erling Sivertsen, til Medier24.

«Det er mange konflikter i miljøet som stel energi og tid. Vi opplever gråt og støy», svarar ein tilsett i rapporten.

Stamina har i arbeidet avdekt «mykje baksnakking og alliansebygging», og dei får inntrykk av at «alt» leiinga gjer er gale.

I rapporten står det at fleire tilsette kommenterer at «dekan må besinne seg, vi treng ro, slik at endringane får sette seg».

Tillitsvald: – Mogleg å reparera

Eit mindretal av dei spurde i undersøkinga (14 av 50) meiner enkelttilsette set eit særleg negativt preg på arbeidsmiljøet. Fleire seier dei ikkje let seg leie, og at dei spreier mykje negativitet, ifølgje undersøkinga. Slik forklarar dei det:

• «Det blir støy og omkampar når ein blir utsett for leiing»
• «Det er noko sutring i miljøet der tilsette er uenig for å vere uenig»
• «Destruktive krefter i sving, blir ikkje tatt tak i»
• «Nokre få personar gjer akkurat som dei vil, skaper utruleg mykje jævelskap. Det får ingen konsekvensar. Det er øydeleggande for oss internt og overfor studentane»

Fleire reagerer òg på språkbruken internt. Tilsette kommenterer det slik overfor Stamina:

• «Det er mange som snakker stygt om kvarandre, og til kvarandre»
• «....opplever at kollegaer seier direkte til nokon at andre er udugelige, og ingen seier imot»

Resultatet som er presentert i ARK utløyser, ifølgje Arbeidsmiljølova, aktivitetsplikt for å handtera situasjonen, står det i Stamina-rapporten.

Tillitsvald Sivertsen kommenterer vidare:

– Det er mykje som kjem til overflata når du byrjar å jobba med slike ting. Ei viss polarisering er det på alle arbeidsplassar, men ARK-undersøkinga var tydeleg på at det var konfliktar, og dei sterke konfliktane var knyt til forhold til avdelingsleiinga.

– Eg trur absolutt det er mogleg å reparera arbeidsmiljøet. Alle er innstilt på at me skal få til dette, seier han.

Rotevatn: – For dårleg over mange år

Det kjem òg positive kommentarar til dekanen, då nokre meiner ho har stor arbeidskapasitet, gjennomføringsevne, er hyggeleg og imøtekomande.

Nedst i Stamina-rapporten er det lagt ved eit skriftleg svar frå dekan Rotevatn, kor ho mellom anna skriv:

«Det har vore harde ord og gode tilbakemeldingar, konstruktive tilbakemeldingar. Det er eit svært samansett bilete, og eg tar alle tilbakemeldingane på største alvor.»

(…)

«Arbeidsmiljøet har vore for dårleg over mange år. For at vi skal få det betre på jobb, treng vi å bli samde om konkrete område vi må jobbe med. Ein person kan ikkje gjere det åleine, vi må gjere det saman.»

(…)

«Det er ikkje kjekt når mange er misfornøgd med leiaren sin. Det er likevel ikkje uvanleg at ein organisasjon med den første store endringa på lang tid, fører til misnøye. Endring er krevande, AMF har gjennomført den første endringa i avdelinga på om lag femti år. Likevel er det eit mål og eit sterkt ynskje frå meg at flest mogleg er fornøgde. Eg ynskjer også å ta vare dei som har det bra på jobb og som også er fornøgd med meg som leiar.»

Då Medier24 tek kontakt med Rotevatn viser ho til advokat Tore Lerheim ved Homble Olsby for kommentarar. Han ynskjer ikkje å kommentera saka.