Høgskulen i Volda

Volda står ved vedtaket om å omplassera dekan Rotevatn

– Eg håpar me kan gå over i ein normaltilstand. Det er ikkje normalt å kommunisera med kvarandre via advokatar eller fagforeiningar, seier rektor Johann Roppen.

Ole Alexander Saue

Eira Lie Jor

Publisert 26.08.2019 - 16:35

Denne artikkelen er over to år gammel.

Fredag 16. august sende dekan Audhild Gregoriusdotter Rotevatn ved Høgskulen i Volda klage på vedtaket om tvungen omplassering på høgskulen etter kraftig intern uroa knyt til arbeidsmiljøet og Rotevatn.

Måndag fekk Rotevatn svar på klage, ifølgje rektor Johann Roppen ved høgskulen.

– Brevet er unnateke offentlegheita, men me har ikkje forandra syn på saka ut frå klaga, seier Roppen til Medier24.

Skal jobbe med rektor og direktør

– Kva vil skje vidare no?

– Me steller oss til breva som kjem. Eg håpar me kan gå over i ein normaltilstand snart. Det er ikkje normalt å kommunisera med kvarandre via advokatar eller fagforeiningsrepresentantar, seier han.

– Kva skal Rotevatn gjer i den nye rolla?

Rektor Johann Roppen ved Høgskulen i Volda.

– Det vil me snakke me ho om. Ho skal ha ei rolle i forhold til mediehusa og arbeidet med det, også i forhold til strategisk rådgjeving – tett opp mot rektor (Roppen) og direktør (Per Halse).

– Er stillinga ei degradering?

– Det er feil å seie, fordi ho har stadig dekan-tittelen og skal jobba like tett opp mot toppleiinga.

– Fryktar de at ho tek det til retten?

– Det har ho antyda at ho stadig vurderer. Me håpar ikkje det, seier han.

Kan bli søksmål

Rotevatn får no bistand av Geir Waage Aurdal, seniorrådgjevar ved arbeidslivsavdelinga til fagforeininga Samfunnsviterne.

– Me vurderer svaret frå høgskulen og vil ta stilling til kva me gjer i løpet av dei neste dagane, seier Geir Waage Aurdal ved Samfunnsviterne til Medier24.

Han ynskjer ikkje å kommentera saka ytterlegare på noverande tidspunkt.

For at Rotevatn kan ta oppseiinga til retten, må domstolen ha vurdert det slik at den administrative klagemoglegheita er uttømt. Klageinstans vil vera Kunnskapsdepartementet.

Medier24 har forsøkt å få ein kommentar frå Rotevatn utan å lukkast.

Rektor: – Ting må takast tak i

– Har de gjort tilstrekkeleg for å vareta Rotevatn den siste tida?

– Sjølvsagt er dette ein vanskeleg situasjon for både ho og andre involverte. Me forsøker å gjere det som er rett for å ta vare på ho og andre. Det er ein av grunnane til at me håpar at me kjem til ein annan type form for kommunikasjon, seier Roppen.

– Er det noko de burde gjort annleis?

– Det er altfor tidleg å seie. Det får me evaluere i ettertid. Det er openbert at ting må takast tak i når saka er blitt som den er blitt.