Aslak Bonde sluttar i Morgenbladet i protest

Det opplyser Bonde til Medier24.

Etter at Morgenbladet for ein dryg månad sidan varsla dei tilsette om at dei skal kutta åtte millionar i personalkostnadar har ni personar fått innvilga sluttpakke.

I tillegg har redaksjonsklubben ytra sterk mistillit overfor sjefredaktør Anna B. Jenssen. Klubben har også i lengre tid protestert kraftig mot kutt dei ikkje meiner er naudsynt å gjennomføra på noverande tidspunkt.

– Veldig vemodig

Politisk kommentator Aslak Bonde i Morgenbladet seier no til Medier24 at han gir seg i avisa som protest mot måten NHST og styret behandlar avisa som dei kjøpte opp i 2016.

– Det er veldig vemodig, seier han til Medier24, og legg til:

– Eg har halde igjen litt, for eg har håpa dei skulle sjå kor urimeleg kutta er. Då Jenssen sa at auken i pressestøtta ikkje har noko betydning for nedbemanninga viste ho at journalistikk ikkje er det viktigaste i produktet ho er redaktør for.

Bonde seier han er open for å starta opp noko nytt, som liknar Morgenbladet, med nytt namn.

Torsdag ettermiddag skriv Dagens Næringsliv og Journalisten at 32 skribentar og spaltistar nektar å levere stoff til Morgenbladet framover.

• Les også: Aslak Bonde: Individualister ja, anarkister nei
• Les også: Aslak Bonde: Jeg støtter redaksjons­klubben fullt ut

Bonde har varsla sjefredaktør Jenssen om avgangen, og er open for å halda fram med ei oppseiingstid. Det håpar redaktør Jenssen at han gjer.

Ho kommenterer avgangen slik overfor Medier24:

– Det er utruleg trist. Aslak Bonde har vore ein berebjelke i Morgenbladet. Det blir vanskeleg å erstatta han.

Ifølgje Bonde har han hatt noko på trykk i avisa i kvart einaste nummer sidan 2003.

– Det er det vel ingen andre som har gjort. Det er i Morgenbladet eg har vore lengst, då det er det prosjektet eg har knytt meg sterkast til.

Forstår avgjersla

Klubbleiar Jo T. Gaare seier det var trist å høyra at Bonde sluttar i avisa. Han var ikkje klar over avgjersla då Medier24 tok kontakt torsdag ettermiddag.

– Dette var veldig trist å høyra. Aslak Bonde har vore viktig for å analysera politikken både for lesarane og oss som jobbar i avisa, sånn at me ser samanhengane i politikken betre. Men me har forståing for grunngjevinga han gir for å slutta, og registrerer at han nemner den ekstra pressestøtta me skal få, som me òg meiner bør brukast på å rusta opp journalistikken, seier han til Medier24.

Han legg til:

– Dette er leiinga faktisk ikkje samd i, og det er ei gåte for oss. Me vil òg takka for støtta han har vist oss i den djupe krisa som går føre seg.

No håpar klubben at Bonde at vil skriva for avisa igjen dersom leiinga tek grep «han tykkjer er gode i næraste framtid.»

– Fri for å skriva for andre

Den tidlegare Aftenposten-journalisten har i lengre tid å forsøkt å få ei forklaring frå Morgenbladet-styret, seier han til Medier24. Det har han ikkje lukkast med.

– Dagsnytt 18 forsøkte i tre dagar å få meg i debatt med styret, men det var umogleg, seier han.

Bonde, som elles skriv for Dagens Perspektiv, Stat & Styring og Forum, held dørene opne for nye oppdrag.

– Eg er no fri for å skriva om politikk for andre også, seier han.