Lokalavis flyttar ut av kommunen: – Ser ikkje at kommunegrensa skal ha så mykje å seia

Nyleg flytta lokalavisa Askøyværingen ut frå sine gamle lokale og ut i nye lokale med samarbeidsavisa Vestnytt – på Straume i nabokommunen Fjell.

Dermed skal den Schibsted-eigde avisa dekkja Askøy kommune med kontorlokale om lag 12 kilometer frå kommunesenteret i Askøy. 

– Ein kan alltids bli nervøs for kva lesarane tenkjer, som at me ikkje skal satsa på Askøy. Målet er jo nettopp å satsa på journalistikken, og det viktigaste er å laga eit bra produkt for lesarane. Produktet er viktigare enn kvar du sit og skriv ut saka, seier redaktør Marit Kalgraf i Askøyværingen og Vestnytt til Medier24.

– Ingen tykkjer idéen er dårleg

Kalgraf fortel at begge avisene var nøydd til å flytta ut frå sine gamle lokale, og at dei tidlegare kontora var for store. Då bestemte ho seg for å samlokalisera dei to søsteravisene i Straume, som er midt i dekningsområdet for Vestnytt.

– Me har stadig eit lite kontor på Kleppestø, kor journalistar kan møta kjelder eller skriva ut saker når det er mest praktisk, men ingen sit der fast frå 8-16, seier Kalgraf.

Ho avviser at det er problematisk å ha hovudsete utanfor dekningskommunen Askøy. Avisene har både felles redaktør, felles nyheitsleiar og felles desk.

– Når journalistane sit på same plass, får me eit større og sterkare fagmiljø, me lærer av kvarandre, kommuniserer enklare og deler kompetanse i det daglege, seier Kalgraf.

– Ingen av dei tilsette har gitt uttrykk for at ideen om samlokalisering er dårleg. Tvert om, seier ho.

– Det er ingen utfordringar ved å sitja i ein annan kommune og dekkja Askøy?

– Eg ser ikkje at kommunegrensa skal ha så mykje å seia for det. Spesielt ikkje når ein har moglegheit til å sitja på Kleppestø.

Lengre reiseveg

Journalist og medlem av klubbstyret i avisene, Jan Erik Storebø, er positivt innstilt til flyttinga.

– Me vert meir samla, med felles redaksjonsmøte og ting vert gjort meir på tvers. Tidlegare har det vore litt stussleg på Askøy-kontoret når me berre har vore to, maks tre, på kontoret – og om lag det same på Vestnytt sitt kontor, seier han.

– Kva med reiseavstand ved dekking av ulukker og liknande?

– Det vert sjølvsagt lengre reiseveg, men det er jo ikkje slik at ein alltid er fysisk ute og dekkjer hendingar, sjølv om me melder det.

Han er oppteken av at terskelen for fleksibilitet og gode høve til å bruka det vesle lokalkontoret.

– Me har fått beskjed om at terskelen for å rykkja ut skal vera minst like låg som før. I tillegg har me vore i god dialog med redaktøren om fleksible løysingar for arbeidstid og bruk av Askøy-kontoret. Me er opptekne av å få bruka det kontoret for ein mest mogleg smidig kvardag, og minst mogleg tid i bil.

– Ingen stor ståhei

Redaktør Kalgraf er innforstått med at fleire vil frå lengre reisetid, men presiserer at det ikkje har vore eit stridstema internt.

– Det er ingen som likar å få lengre reisetid når ein tidlegare har hatt kort reisetid til jobb. Men det har ikkje vore stor ståhei om det.

– Det første eg gjorde var å spørja dei tilsette, både i plenum og kvar for seg. Eg involverte dei tilsette ekstremt tidleg, og då meinte folk at idéen var god.

– Fryktar du at flyttinga kan påverka lesarane sitt forhold til avisa? Kan det svekkja omfanget av lesartips eller folk som kjem på døra med tips?

– Det er svært få som besøker avisa på kontoret. Dei aller fleste tek kontakt med oss via e-post eller telefon, så eg fryktar ikkje at tipstilfanget skal bli dårlegare. Så lenge me kjem oss ut på saker og møter askøyværingar der dei er, og så lenge vi leverer god journalistikk, er det der vi skapar eit godt forhold til lesarane.