Snorre Valen blir politisk redaktør i nettavisa Nidaros i Trondheim

I slutten av november slapp Amedia nyheita om at dei bryt avismonopolet i Trondheim og lanserer avisa Nidaros.

Med seg på laget får dei Snorre Valen som blir politisk redaktør i avisa.

– Dette vil eg vera med på av mange grunnar. Det viktigaste er at Trondheim er ein ørken mediemessig. Det er fantastisk at det blir seriøs aviskonkurranse i byen. Det gir moglegheiter for ein annan type politisk debatt, seier Valen til Medier24.

Blikk for makt

Han har lang politisk røynsle frå Stortinget og var nestleiar i SV frå desember 2015 til september 2017.

– Korleis blir det å gå frå partipolitikk til nøytral redaktørrolle?

– Personleg er det vemodig, men samstundes er det veldig uproblematisk. Det handlar først og fremst om forståing av rolle og mandat. Kva politisk bakgrunn eg har er det ingen tvil om, og det skal heller ikkje leggast skjul på, seier Valen.

– Kva kan du bidra med som avismann?

– Blikk for makt og maktskilnader blir det viktigaste for meg. Det er ei lokalavis, og me skal vera veldig lokale. Likevel blir eg ein politisk redaktør med rikspolitisk røynsle. Det trur eg at eg er ganske åleine om, seier han.

Det er likevel ikkje første gang Valen forsøker å utfordra monopolisten Adresseavisen i Trondheim. Han var dagleg leiar i Arbeideravisa som vart lansert i januar 2008, men som gjekk dukken allereie sju månadar etter.

 – Eg vil seia det gjekk såpass i dass sist at eg meiner dei er modig som tek sjansen, seier Valen og ler.

– Klar over fortida hans

Sjefredaktør Arne Reginiussen i Nidaros er nøgd med tilsetjinga.

– Han kjenner byen godt, har stort kontaktnett og god forståing både for samfunnet, politiske- og foreiningsprosessar i Trondheim. Han er ein folkeleg type som vil laga avis for folk flest.

– Valen vil bidra til at me blir gode på meiningsinnhald og han blir nyttig når me skal navigera i det politiske landskapet i byen.

– Korleis vurderer de hans relativt ferske partipolitiske tilhøyrsle?

– Me er sjølvsagt klar over hans fortid som politikar. Alle har på eit nivå ei politisk meining, men han har meld seg ut av alle verv og har ingen bindingar lenger. Det viktigaste er at han er oppriktig oppteken av Trondheim og vil ha utvikling i lokalsamfunnet. At han har god innsikt i politiske prosessar er veldig viktig og ein fordel.

– Er det uproblematisk eller kan det potensielt bli eit tillitsproblem?

– Eg ser eigentleg på det som ein fordel at han har så brei røynsle og kjennskap til politiske prosessar og viktige saker i regionen. Han ynskjer å leggja til rette for ein politisk debatt kor både opposisjonen og posisjonen kjem til orde.