Redaktør­topp tok debatten i ut­skjelt Resett-kommentar­felt

Nyleg vart generalsekretær Arne Jensen i Norsk Redaktørforening intervjua av Resett-redaktør Helge Lurås om mellom anna ytringsfridom, «no-platforming» og Donald Trump.

Kommentarfeltet fylte seg kjapt opp. På tre dagar er det langt over 100 kommentarar under artikkelen – og 17 av dei er signert Jensen sjølv, som ynskja å møta kritikarane i kommentarfeltet.

– Eg trur på enkel psykologi. Tek du folk på alvor, så gjer det noko med dei du diskuterer med, seier Jensen til Medier24.

– Er det naturleg for deg å delta i kommentarfeltet kor du er intervjua, eller var det eit ekstra poeng i at det er Resett sitt?

– Det var naturleg å gjera når eg har lett meg intervjua og det vert opna kommentarar. Det var eit lite ekstrapoeng i at folk kanskje ikkje hadde venta at eg skulle vera der, seier Jensen.

«Kloakkrotter»

Den alternative nettstaden Resett har lenge skapt uro i den norske mediedammen. Redaktør Helge Lurås har blitt nekta innpass i Redaktørforeningen, dei har blitt skulda for systematiske brot på Ver Varsam-plakaten og ei rekkje politikarar har vore høglydte i sin kritikk av nettstaden.

Og nettopp kommentarfeltet har vore grobotn for mykje av kritikken.

Advokat Jon Wessel-Aas har kalt Resett-lesarane «kloakkrotter», og nyheitsbyrået NTB har stilt som krav til Resett å stenga kommentarfeltet under artiklane deira. Nyleg sletta Høyskolen Kristiania ei twittermelding med lenke til eit Resett-intervju med dosent Elin Ørjasæter, fordi dei ikkje ville assosierast med nettstaden.

Positivt overraska lesar

At Jensen tok debatten, gjorde inntrykk på fleire.

«Jeg er positivt overrasket over at du kommenterer her og retter opp feil. Bare pass på at du ikke får kjeft nå da for å ha kommentert på "rasistiske" Resett», skreiv ein Resett-lesar i kommentarfeltet.

Då svarte Jensen mellom anna:

«Jeg er uhyre kresen med bruk av rasismebegrepet, og mener det tidvis har gått inflasjon i det, noe som lett bidrar til å avspore viktige debatter. Og for ordens skyld: jeg kaller aldri kommentarfelt eller kommentatorer for noe som har med kloakk å gjøre. Jeg tar mennesker på alvor. Og skulle jeg få kjeft for å kommentere på Resett, så tar jeg det med lett hjerte.»

– Det er ingen god måte å få til meiningsmangfald og -brytning om ein berre skal la seg intervjua og delta der ein finn menneske ein er samd med. Slik oppstår ekkokammer, seier Jensen til Medier24.

– Høyskolen Kristiania har sagt dei ikkje vil «assosierast med Resett». Var du i tvil om du ville la deg intervjua av Resett? 

– Nei. Eg skal stå inne for det eg seier og meiner, og Resett som nettstad kan ein meina mykje om, men det er ikkje ein nettstad ein ikkje kan bli intervjua av. Det er ei feil tilnærming, og me må vera på arenaer kvar folk er. Saka vart heilt ålreit, eg vart sitert korrekt, men sjølvsagt var vinkla ut frå kvar Resett står ideologisk. Saka har eg ingen problem med.

Jensen har ikkje fått éi negativ tilbakemelding på å blitt intervjua, seier han, men tvert om fått tommelen opp frå styret i Redaktørforeningen.

– Dette applauderer eg

Redaktør Helge Lurås i Resett er svært positiv til at Jensen gjekk inn i kommentarfeltet deira.

– Eg tykkjer det er eksemplarisk at han gjer det. Det set preg på debatten under også. Det applauderer eg, seier Lurås.

– Var dette noko du hadde venta deg?

– Nei, det er ikkje noko me ventar at folk gjer. Men at det er han som gjer det overraskar meg ikkje. Eg oppfattar Jensen som ein ærleg og profesjonell utøvar av jobben som generalsekretær i Norsk Redaktørforening.

Lurås tykkjer kommentarfeltet vert meir givande og interessant så fort ein får inn motstemme.

– No har me heldigvis ein del av det på Resett også. I blant går folk, som truleg vil plassera seg på venstresida, inn og kommenterer. Det er altså ikkje heilt fritt for det, men det er gjerne eldsjeler. Eg skulle ynskja det var fleire. Når det blir så konstruktivt som det Jensen bidreg med, er det utvilsamt bra, seier han.