Stor usikkerheit for PR-byråa: – Om dette varar lenge, vil krisa påverka alle

Måndag sende PR-byrået Geelmuyden Kiese ut permitteringsvarsel til 21 medarbeidarar som følgje av koronakrisa og inntektssvikt.

Dermed gjer det tradisjonsrike byrået som ei rekkje andre store selskap i norsk næringsliv.

Koronaepidemien har skapt sterk uro for norsk og internasjonal økonomi. Børsane er i fritt fall, Nav melder om 84.000 fleire arbeidsledige siste veke og regjeringa går inn med minst 100 milliardar i krisepakke til næringslivet.

– Uaktuelt å permittera

PR-byråa Gambit, First House, Corporate Communications og Kruse Larsen avviser derimot at permitteringar er aktuelt på noverande tidspunkt.

– Permitteringar er overhovudet ikkje på agendaen hos oss, men det er vanskeleg å seia 100 prosent korleis verda ser ut om 3 eller 6 månadar. Men det er ingenting i situasjonen som seier at me kjem til å gjera det.

Det seier sjef og partner Are Slettan i Corporate Communcations til Medier24.

Han seier at ein del oppdrag er utsett, men at dei likevel får mange nye oppdrag i samband med sjølve koronasituasjonen og ringverknadar av det. 

– Førebels har me mykje å gjera og fullt fokus på å hjelpa kundane våre, seier han.

– Men det er usikkert, og me må rekna med at det vil ha ein effekt framover. Det er usikkert, men førebels er det mykje å gjera, legg han til.

Forventar fleire kanselleringar

Også i Gambit er det «relativt få» kanselleringar per i dag, seier Gambit-sjef Henrik Halvorsen til Medier24.

– Men me forventar jo at dette kan stiga. Me ser òg at ein del aktørar som har planlagt større møte og konferansar ser på digitale moglegheiter i staden. Det er positivt og som internasjonalt selskap har me gode moglegheiter for å hjelpa med akkurat dette. Mange er faktisk veldig opne for denne type løysingar.

Han seier at også ei har ein auke i oppdrag knytt til krise- og internkommunikasjon og myndigheitskontakt. Men:

– Taktiske marknadskampanjar vil nok reduserast i tida som kjem, men me ser òg at ein del redefinerer dette til andre formål som kundedialog og meir omdømmerelaterte kampanjar.

Heller ikkje ei har bestemt å permittera nokon.

Saka held fram under tabellen.  

– Vanskeleg å gi gode svar

Dagleg leiar og partner Jan-Erik Larsen i Kruse Larsen fortel om ein veldig spesiell situasjon for heile samfunnet, og at det også vil treffa PR-bransjen på sikt.

– Når det råkar heile Norge og næringslivet råkar det også vår bransje, seier han.

Men også dei har hatt ei hektisk siste veke.

– Det har kome inn nye kundar som treng hjelp til krisehandtering, seier han, og legg til:

– Men situasjonen er veldig uoversiktleg, og ingen veit kva som vil skje. Om dette varar lenge vil krisa påverka alle, også vårt selskap.

Kruse Larsen har no sett i gang ein prosess for å spara kostnader, og tek bort alle kostnader som ikkje er absolutt naudsynt for å halda verksemda gåande.

– Om den økonomiske situasjonen forverrar seg langvarig er alle tiltak aktuelle.

– Permitteringar også?

– Slik det er akkurat no er ikkje permitteringar aktuelt, men det er uoversiktleg – og vanskeleg å gi gode svar.

Apeland fryktar lite

Dagleg leiar Ole Christian Apeland i byrået Apeland fortel om «business as unusual».

– Me driv business som vanleg, men på ein litt uvanleg måte, seier han til Medier24.

Apeland seier kundemassen deler seg i tre: dei som må løysa utfordringar som koronasituasjonen skapar, dei som ventar og er usikre, og dei som ser moglegheiter.

– Det er fleire som ser moglegheiter i denne situasjonen.

– Kva fryktar de denne urolege tida vil ha å seia for dykk?

– Me fryktar generelt veldig lite, men me er førebudd på alt mogleg. Me følgjer me på situasjonen – men akkurat no ser det bra ut.

Worst case-scenariet

Dagleg leiar Per Høiby i First House opplever at det er stort behov hos kundar for oppdatering og råd knytt til ulike tiltak som myndigheitene set inn og verknadane av dei.

«Vi har ikke opplevd frafall av kunder, og bare i svært liten grad at planlagte prosjekter er blitt skjøvet på i tid. Dette vil forsterkes i tråd med varigheten av unntakstilstanden», skriv han i ein sms til Medier24.

«Situasjonen er for tiden både uforutsigbar og bevegelig. Vi planlegger ut fra et worst case der unntakstilstanden vedvarer gjennom året. Selv med myndighetenes igangsatte og varslede tiltak og pakker, antar vi at tempoet i næringslivet vil synke vesentlig. Det vil trolig påvirke oppdragsmengde og inntekter også for oss», skriv han vidare.

På spørsmål om permitteringar vil vera aktuelt på sikt, svarar han:

«I god kriseplanlegging må man alltid ta utgangspunkt i worst case-scenariet. I et slik scenario vil permitteringer være ett av flere tiltak også vi må vurdere.»