Avisreklame for dyrt for fleire parti: – Umogleg utan rike onklar

Medier24 har snakka med alle stortingspartia om kva planar dei har for annonsering i valkampen som for alvor er i ferd med å sparkast i gong i desse dagar.

Gjennomgangen viser at fleire aviser droppar avisannonsering i årets lokalvalkamp.

Stramt budsjett

– Kort sagt ser me at verda endrar seg, og det same gjer medievanane. Det er umogleg å ha råd til å satse tungt på slike plattformer utan rike onklar som bidreg med enorme beløp, seier kommunikasjonssjef i Miljøpartiet dei Grøne, Nils Mørk, til Medier24.

– Me har ikkje store nok budsjett til å gjere det på ein god måte. Me forsøker å få meir gjennomslag ved å annonsere i sosiale medium, seier han vidare.

Det same er beskjeden frå valkampleiar Kristian Fjellanger i Sosialistisk Venstreparti (SV).

– Me har fått ein del tilbod og takka nei, seier han til Medier24.

– Papirannonsering ligg ikkje i planen i år, og gjorde det heller ikkje i 2017, held han fram.

Kommunikasjonssjef Mona Høvset i Kristleg Folkeparti (KrF) fortel også at det same gjeld dei.

– Det stemmer òg for oss. Med eit stramt budsjett legg me annonsekronene i sosiale medium, seier ho.

Marknadssjef i Framstegspartiet (Frp), Helge Fossum, ynskjer ikkje å gå ut med detaljar i deira valkampkampanjar.

«Dette er jo først og fremst et fylkes- og kommuneval. Jeg vet ikke hva alle partiene jeg gjør. Men man skal ikke se bort fra at FrP kan bli synlig både her og der», skriv han i ein sms til Medier24.

Saka held fram under innlegget.

Annonsar i nettaviser

Høgre, Venstre og Arbeidarpartiet kjøper alle programmatiske annonsar via mediebyrå. Det gir dei målretta annonsering hos ei ynskja målgruppe, og kan gå på tvers av ulike plattformer og aviser.

Steinar Haugsvær, kommunikasjonssjef i Venstre, seier følgjande til Medier24:

– Det kan godt hende at lokallaga gjer ting, men nasjonalt vert det ingen papirannonsering. Det gjorde me så seint som i 2017, men det handlar om budsjett og kva me har råd til.

– Me har hovudtrykket på programmatiske annonsar, seier han.

Klassekampen og distriktsaviser

Generalsekretær Knut M. Olsen i Senterpartiet (SP) seier han ikkje har oversikt over fylkeslaga, men legg til at dei frå sentralt hald truleg kjem til å annonsere i TUN Media, som gir ut Nationen, Bondebladet, Norsk Landbruk og Traktor.

Rødt, på si side, kjem til å annonsere i Klassekampen, kor dei er største eigar med knapt ein femtedel av aksjane.

– Me annonserer i Klassekampen på papir, som treff målgruppa vår. Me brukar ikkje enormt mykje pengar på annonsar i valkampen, då me legg meir pengar i grasrotvalkamp og sosiale medium, seier kommunikasjonssjef Iver Aastebøl i Rødt.

Høgre: Papir mot slutten av valkampen

Thoralf Granerød, kampanjesjef i Høgre, fortel at dei satsar både i sosiale medium og programmatiske annonsar.

– Me har ei tung satsing i sosiale medium, der Facebook er hovudkanalen. Høgre har i tillegg hatt tradisjon dei siste to valkampane for å samarbeide med Snapchat, seier han.

– På papiravissida skal me gjere noko mot slutten av valkampen, men lite – og me har enno ikkje bestemt volum og mengde, seier han.

 Saka held fram under innlegget.

AP: – Prioritert lokalt

Ingrid Langerud, kommunikasjonssjef i Arbeidarpartiet, fortel at dei kjøper annonsar programmatisk, og at nett og sosiale medium er deira viktigaste kanalar.

– Me har dei seinare åra hatt avgrensa med annonsering på papir frå Arbeidarpartiet sentralt, medan for nokre av våre partilag lokalt har dette vore prioritert, seier ho.

– Våre vurderingar er basert på ein kombinasjon av vår valkampstrategi og målgrupper, tidlegare erfaringar og budsjettmessige omsyn. Me har mediebyrå som assisterer oss med vurdering av tilbod og kontakt med tilbydarar.