På to år har Morgenbladet krympa med 18 sider

Medier24 har gjort ein gjennomgang av alle Morgenbladet sine papirutgåver sidan januar 2016. Resultatet viser ein markant nedgang i talet på sider per utgåve.

Sidan 2017 har snittet gått frå 58 sider per utgåve til 48, som er gjennomsnittet for heile 2019. Dei siste 16 derimot har eit snitt heilt nede i 41,5 sider, og den siste utgåva var nede i 40 sider.

– Sidan i sommar har me hatt eit prøveprosjekt kor me har redusert talet på sider til 40. Det er både redaksjonelt og økonomisk grunngitt, seier sjefredaktør og administrerande direktør Anna B. Jenssen til Medier24.

– Me har fått ei tilbakemelding på lesarundersøking om at avisa er for stor, at den hopar seg opp, og at lesaren får dårleg samvit av alt som ikkje blir lese, legg ho til.

Jenssen seier at storleiken på avisa også er avhengig av annonsetilfanget.

– Dette er delvis også eit sparetiltak, men mest at me opplever at lesaren vil ha ei stramt redigert og godt kuratert avis, og at me i ei mindre avis har tid til å prioritera betre og vera strengare med oss sjølv, seier Jenssen.

Stabilt hos konkurrenten

Til samanlikning har Morgenbladet sin nynorsk-konkurrent, Dag og Tid, halde eit jamt nivå på sidetal per utgåve, med om lag 40 sider i snitt både i 2016 og 2019.

I dei to åra i mellom var det derimot fleire enkeltutgåver med 48 sider, som drog snittet opp på høvesvis 43 og 44 i 2017 og 2018.

Jamt har det også vore hos Klassekampen, som også har papir som sitt hovudfokus. Dei har lege stabilt på like over 40 sidan 2016. 

Tynn digitalavis

I tillegg til papirutgåva som kjem ut kvar fredag, publiserer Morgenbladet ei digital utgåve kvar tysdag.

Den digitale utgåva har inntil dei to siste vekene hatt eit snitt på 18 saker per utgåve. Dei to siste utgåvene har derimot bestått av ikkje meir enn høvesvis åtte og ti saker.

– Kor mange saker den digitale utgåva skal ha kjem an på kva som skjer den veka, seier Jenssen til Medier24.

– Er det vanskeleg å få produsert nok saker for tida?

– Me opplever ikkje det. Eg veit det har blitt stilt spørsmål rundt det, men me får det til.

– Korleis ser stoffbanken ut?

– Den ser ut som den skal.

– Får de laga avis framover?

– Ja, me får til det. 

I 15-tida tysdag har endå ikkje den digitale avisa kome ut denne veka.

Klubbleiar: – Sparer på alle frontar

Klubbleiar Jo T. Gaare seier til Medier24 at han var klar over strategien ved å kutta til 40 sider i avisa.

– Då er det noko anna enn dersom det er eit reint sparetiltak, seier han til Medier24.

Gaare held fram:

– Men om det er for å spara, er det jo ikkje ei kvalitetsvurdering som ligg i botn. Det er ingen hemmelegheit at me sparar på alle frontar for å komma i mål med budsjetta.

Typisk sparegrep, ifølgje forskar

Medieforskar og instituttleiar ved Institutt for kommunikasjon ved Høyskolen Kristiania, Jens Barland, er ikkje spesielt overraska over den akutte nedgangen hos Morgenbladet.

– Det kan henda det anten speglar nedgang i annonsar eller stoffreduksjon. Kutt i sider er typisk for aviser som skal spare pengar, seier Barland til Medier24.

Han held fram:

– Du vil truleg kunne identifisera ein nedgang i sidetal hos dei aller fleste aviser.

– Er ikkje Morgenbladet i særstilling med sin forretningsmodell?

– Dei har visse likskapstrekk med korleis Klassekampen har jobba, men dei er ikkje i meir særstilling enn at også dei er nøydd til å tilpassa kostnadane til marknaden, seier Barland.