Ann-Kristin må levera sju saker kvar dag som journalist i lokalavis

– Det er skatteliste-dag, eg har ei kjelde som ventar sitatsjekk, og det er deadline snart. Kan me ta det i morgon?

Nyvald NJ Nord-leiar og journalist Ann-Kristin Hanssen i Narvik-avisa Fremover har travle dagar på jobb. I den ferske rapporten til Norsk Presseforbund sitt kjeldeutval fortel Hanssen om tidspress og krav om å levera sju saker i tidsrommet 09-14.

Når Medier24 slår på tråden for å ber ho utdjupa, får me beskjed om å slå på tråden dagen etter. Ho har ikkje tid.

– Færre skal gjera meir

Den travle nettkvardagen går utover kjeldearbeidet, meiner Hanssen, som har lang fartstid i den Amedia-eigde lokalavisa.

– Eg trur det er verre for dei som er unge og ferske no, enn det var då eg byrja i yrket. Det er vanskelegare for unge i dag å bygga opp kjeldenettverk, fordi du har mindre tid på deg i arbeidstida – og då må du gjera det på fritida, seier ho til Medier24.

Hanssen peiker vidare på at ein får for lite tid til å gå djupt inn i meir tidkrevjande saker.

– Ein må prioritera ganske knallhardt med ressursane ein har. Difor glipp ein på saker ein før ville ha teke, seier ho.

– Ein tek mykje meir via telefon. Før reiste me rundt og henta inn saker på helgevakter, medan me no gjer mest frontarbeid, legg ho til.

Hanssen har vore i Fremover i 23 år, jobba som nettansvarleg i dryge ti år og var med på å byggja opp Fremover.no. Ho ser korleis nettkvardagen krev at avisa er kontinuerleg oppdatert.

– Me er færre folk som skal gjera meir, seier ho.

Går glipp av kjeldepleie

Redaktør Christian Senning Andersen kjenner seg att skildringane frå journalisten sin.

– Det er ikkje til å stikka under ein stol at turnusen og dagens arbeidskvardag krev at ein er meir til stades i redaksjonen. Det er uheldig, fordi ein kan gå glipp av kjeldepleie, seier han.

Han er likevel oppteken av å gi tilsette dispensasjon til å gå utanfor redaksjonslokala, og bruka meir tid på saker, når dei har gode idéar. Han viser til ein journalist med base i Evenes som vart sendt til Fagmilitært råd for å bygga relevant kjeldenettverk i vidare arbeid med forsvaret og striden om ny kampflybase.

Hanssen seier at det samvitet speler inn om ein ynskjer å ta på seg større oppgåver – i ein sårbar, og liten, redaksjon.

Det har redaktøren forståing for.

– Eg forstår at ein kanskje ikkje tør å spørja om slikt fordi turnusen raknar. Det seg et pris på – fordi det viser eigarskap og lojalitet overfor kollegaene. Men samstundes oppmodar eg til å seia frå om ein vil gjera slikt, seier redaktør Senning Andersen.

– Me skal ikkje levera store overskot

Hanssen meiner avisa burde fått meir til journalistikk, og mindre til utbyte.

– Dersom journalistikk er det viktigaste, må ein vera villig til å lempa litt på utbyttekravet. Me er trass alt ei stifting, og skal ikkje levera store overskot til nokon som skal ta utbytte lenger, seier ho.

Senning Andersen meiner overskot er viktig for å rusta seg for vidare drift.

– Eg opplever ikkje krava om lønsemd som urimelege, men eg hadde ikkje protestert om dei vart lempa bort, seier han.