Finans­Watch trassar koronaen: No er dei på lufta – med fem journalistar

I februar skreiv Medier24 at tidlegare Dagens Næringsliv-journalist Magnus Eidem blir redaktør for den nye finans­avisa FinansWatch.

Då sto Eidem midt oppe i ein rekrutteringsprosess. Trass koronasituasjonen har Eidem fått stabla opp ein redaksjon som tel fem journalistar, i tillegg til ein salsmedarbeidar.

– Korona har ikkje bremsa våre planar i det heile teke. Rekrutteringar, tilsetjingar og oppstart har alt gått etter planen, seier Eidem til Medier24.

Tysdag gjekk dei på lufta.

– Me var såpass heldig med timing at me hadde kome langt med rekrutteringa rett før stenginga, legg han til.

– Lærerikt

FinansWatch er ei nisjeavis for finansbransjen. Dei er eigd av danske JP/Politikens Hus sitt dotterselskap, Watch Medier, som i 2018 omsette for 51 millionar norske kroner, og fekk eit overskot på knapt ti millionar. JP/Politikens Hus hadde i 2018 ein omsetnad på knappe to milliardar, og eig aviser som Ekstra Bladet, Jyllands-Posten og Politiken. Watch Medier gir ut 13 nisjeaviser i Danmark.

Redaksjonen består av John Inge Seljehaug, Pernille Johnsen, Christina W. Guldstad og Jörgen Skjelsbæk.

– Det har vore utruleg lærerikt og spanande å ha medarbeidarar som kjem inn og startar rett på heimekontor. Me har hatt ein førproduksjon medan folk sit kvar for seg, seier Eidem.

– Økonomien er turbulent

Dei har jobba med kjeldearbeid og førehandsproduksjon sidan 14. april.

– Eg tykkjer me taklar det arbeidsmessige bra. Me handterer det godt å bruka heimekontor, ikkje møte kjelder eller vera ute og ta bilete. Det løyser seg ved at heile landet er i same situasjon.

– I og med at me dekkjer finansbransjen og økonomien er turbulent er det veldig mykje for oss å ta tak i og skriva om. Det er nok historier å ta av for nokon som går djupare inn i ein bransje.

I februar sa Eidem at formålet deira er å «tilby nisje-/bransjejournalistikk som er mynta på same modell som andre, større, mediehus», og at dei «skal laga uavhengig, objektiv og kritisk journalistikk – utan «stakeholders» i finansbransjen på sponsor- eller eigarsida».

– Krev tolmod

Eidem meiner det er eit godt tidspunkt å lansera på, då det er stort behov for deira journalistikk.

– Har de mål om kor mange abonnentar de skal ha framover?

– Me har ein langsiktig eigar, og me skal byggja dette opp frå botn – bit for bit. Me skal ikkje forhasta oss med noko, men bevisa at me er relevante og så håpar me at abonnentane kjem til oss.

FinansWatch i Norge skal i all hovudsak vera abonnementsfinansiert, med innslag av stillingsannonsar og banner-annonsar. Administrerande direktør Anders Heering i Watch Medier, er førebudd på at det vil ta tid å bli lønsame.

– Det krev tolmod å byggja opp ein abonnementsmodell. I Danmark tek det typisk tre år før eit medium går i overskot. Dersom me klarar overskot etter tre år i Norge er me glade – men det viktigaste er at utviklinga er positiv, sa Heering til Medier24 i februar.