Sjefredaktør Amund Djuve opplyser om at over halvparten av dei tilsette må jobbe heimekontor. Det utgjer i underkant av 100 personar.
– Der det er praktisk mogleg vil me be om at folk jobbe heimanfrå. Det vil vera ulikt frå avdeling til avdeling, seier han.
– Det blir vanskeleg om mange av dei som jobbar med breaking news skal vera heime, men for dei som jobbar med forretning, støttefunksjonar og analytisk arbeid, er det enklare å jobba heime, seier han.
Djuve kan ikkje opplysa konkret om kven som må jobba heime og ikkje, men seier at dei tek løpande vurderingar, og at det vil bli avgjort lokalt blant avdelingsleiarane.
– Me må ta omsyn til smittevern på den eine sida og god drift på den andre sida.
– Journalistisk arbeid er ofte samarbeid, korleis blir det for DN å driva avis med så mange på heimekontor?
– Dette trur eg me kjem me til å takla fint, men du har rett i at journalistikk er samarbeid, og i ein ideell situasjon jobbar me saman. Samstundes har me erfaring med å vera på ulike stader i kortare tidsrom og halda kontakt i chatteprogram. Me skal stadig levera den beste journalistikken om kva koronaviruset betyr for økonomi og næringsliv.
– Og kor lenge vil folk jobba heime?
– Me kjem til å basera oss på anbefalingane som kjem frå helsemyndigheitene.
Djuve fortel om massiv interesse for korona-sakene.
– Me set trafikkrekordar på absolutt alle parameter. Det vera seg innloggingar, sal, og trafikk, seier Djuve.
Morgenbladet, som i likskap med Dagens Næringsliv er eigd av NHST, gjer også drastiske tiltak.
Torsdag vil dei berre vera tre personar vera på jobb, medan dei frå fredag av alle vil jobbe heimanfrå.
– Me har lagt gode planar for kommunikasjon, og me er godt rusta. Me trur ikkje dette skal gå merkbart utover avisa, seier redaktør Sun Heidi Sæbø til Medier24.
