DN-eigar NHST på veg ut av skatte­paradiset Delaware

Nyleg vart det kjent at Dagens Næringsliv og Morgenbladet sine eigarar, NHST, har tre selskap registrert i skatteparadiset Delaware i USA.

Informasjonen vart først kjent gjennom eit lesarinnlegg i DN av Equinor sin pressetalsmann Bård Glad Pedersen.

Opplysingar Medier24 henta frå delstaten sin selskapsdatabase viser at det er NHST sine globale publikasjonar – TradeWinds, Upstream og IntraFish – som er registrert i delstaten.

No opplyser direktør Trond Sundnes for NHST Global Publications at dei ser på ei ny organisering.

– NHST er opptekne av transparents, og difor har me byrja å sjå på det på nytt, seier Sundnes til Medier24.

Kritisk klubbleiar

Til Medier24 tysdag sa politisk rådgjevar Ingrid Hjertaker i Tax Justice Network Norway at det er svært uheldig at NHST har selskap registrert i Delaware. Delstaten har ein hemmelegheitsjurisdiksjon som har veldig liten grad av openheit og få krav til registrering i selskapsregisteret, ifølgje Hjertaker.

Også redaksjonsklubben i Dagens Næringsliv deler kritikken frå Hjertaker.

– Sjølv om NHST ikkje bestemmer avisa sitt innhald, har det fleire uheldige sider, seier klubbleiar Ida Grieg Riisnæs, og legg til:

– For ein mediebedrift der journalistane av prinsipp kjempar for openheit, ser det uklokt ut at morselskapet har selskap i jurisdiksjonar utan innsyn.

Manglande openheit i Delaware

Sundnes presiserer overfor Medier24 at dei ikkje gjekk inn i Delaware av skattemessige årsaker.

Sjefredaktør Amund Djuve i Dagens Næringsliv tykkjer det er positivt at dei er på veg ut frå Delaware. Han var sjølv ikkje kjent med konsernet sine selskap i skatteparadiset.

– Eg har stor forståing for redaksjonsklubbane sine synspunkt. Eg tykkjer det er positivt at konsernet ser på ein ny struktur, seier han.

– Kva meiner du er argumenta for å trekkja seg ut?

– Eg er glad for at NHST Globalt har byrja med det. Det heng saman med Delaware sin manglande openheit, seier Djuve.

Sundnes var sjølv ikkje ein del av leiinga som gjekk inn for etableringa av selskap i Delaware.

– Kva tykkjer du om avgjersla om å gå inn i eit skatteparadis?

– Det var etter råd frå Deloitte. Det har ikkje vore skattemessige motiv for å gjera det. Men eg har forståing for redaksjonsklubben tykkjer det er problematisk.

– Me har skrive kritisk om skatteparadis

Klubbleiar Grieg Riisnæs i DN sa onsdag kveld, får Medier24 fekk opplysingane om at konsernet er på veg ut frå Delaware, at ho håpar NHST vurderer truverdet til DN som viktigare enn at det er praktisk å halda fram med selskap i skatteparadis.

Djuve, derimot, meiner det er journalistikken som avgjer avisa sitt truverd.

– DN har skrive kritisk og undersøkande om bruk av skatteparadis, seier han.

– Men om DN skal halda fram med å skriva om skatteparadis, med ein fotnote oma t morselskapet sjølv har selskap i skatteparadis, påverkar ikkje det truverdet til DN?

– Det som påverkar avisa sitt truverd er journalistikken, og så er det fint om me kan sleppa å ha ein hale som du viser til.