Redaktør meiner Finansavisen kopierer podkast-konseptet hans: – Frustrerande

Det er sju år sidan Amerikansk Politikk, ved redaktør og gründer Are Tågvold Flaten, starta opp det daglege nyheitsbrevet Morgenkaffen. Fire år seinare vart konseptet til podkast, som hadde daglege oppdateringar fram til sommaren 2018. Sidan har det stått stille for podkasten.

– Overraska

No kan ein derimot høyra «Morgenkaffen med Finansavisen», etter at avisa lanserte merkenamnet i haust. Det likar Amerikansk Politikk-redaktøren, som hadde tenkt til å relansera podkasten sin i år, dårleg.

– Me er ein liten dugnadsgjeng som har jobba med dette i mange år. Då er det frustrerande at nokon tek namnet utan å ta ein liten telefon til oss først, seier han til Medier24.

– Eg vart overraska, legg Tågvold Flaten til.

Han meiner Finansavisen må ha vore bevisst på deira namn før dei lanserte sin eigen. Onsdag tok han sjølv kontakt med redaksjonsleiinga i Finansavisen for å seia frå.

Meiner podkasten deira ikkje fanst

Medier24 har vore i kontakt med Finansavisen-redaktør, Steinar Grini, som ber å få spørsmål på e-post.

Skriftleg har Medier24 stilt han spørsmål om når Finansavisen lanserte sitt Morgenkaffen-namn, om dei var klar over Amerikansk Politikk sin, kvifor dei eventuelt likevel valde å bruka namnet, om dei kunne ha teke kontakt med han først – og om dei vil endra namnet.

I sitt svar skriv Grini:

«Faktum er at «Morgenkaffen» til Amerikansk politikk ble avsluttet 11. mai 2018, og erstattet av «2020». At deres «Morgenkaffen» er nedlagt dokumenteres ved at de selv skriver på sin hjemmeside at «2020 er Norges største, beste og eneste podkast om amerikansk politikk». Med andre ord fanst ikke lenger deres «Morgenkaffen» da de lanserte «2020», og da Finansavisen lanserte vår podcast om økonominyheter.»

Amerikansk Politikk-redaktøren meiner skildringa av «2020» openbert er flåsete og ironisk og at lyttarane garantert har vore innforstått med det. Vidare seier han at 2020, undernamnet «Ampolcast», har eksistert parallelt og vekevis med Morgenkaffen sidan 2014, men at den fekk nytt namn i samband med 2020-valet.

– At dei svarar på denne måten tykkjer eg er synd, og rett og slett dårleg gjort av Finansavisen, seier han.

Tågvold Flaten seier det Grini seier ikkje er riktig, og held fram med at podkasten hadde pause, utan at den vart erstatta av ein annan, og at den ikkje vart nedlagt

– Det er uansett ikkje greit å ta eit vel innarbeidd konsept og namn. Finansavisen og redaktøren har heller ikkje teke seg bryet med å svara meg eller oss direkte. Det seier ein del, seier han vidare til Medier24.

– Burde ha teke kontakt

Og torsdag kom første episode av podkasten sidan 11. mai 2018. Den har fått tittelen «Morgenkaffen er endelig tilbake!».

– Planen var å produsera nye episodar i valåret 2020, med støtte frå Fritt Ord, og mildt sagt stor interesse for det amerikanske valet, seier han.

På spørsmål om han har forståing for at han vurderte podkasten deira som nedlagt, og dermed tenkte det var greit, svarar Tågvold Flaten at Finansavisen enkelt kunne løyst det med ein telefon for å dobbelsjekka.

– Då kunne me fortald dei om planane våre, seier han.