Polaris og Amedia nektar tilsette å reisa til Skup og LLA-årsmøtet

• Saka vert oppdatert!

Førstkommande helg går årsmøtet til Landslaget for lokalaviser (LLA) av stabelen i Ålesund. Siste helg i mars vert gravekonferansen SKUP arrangert.

Det vil skje utan tilsette frå aviser eigd av Amedia, som eig 75 lokalaviser og Nettavisen.

Det viser ei intern melding av HR-direktør Lise Dahl Kaartinen på ei Facebook-side for alle Amedia-tilsette, som Medier24 har fått tilgang til.

«Basert på den siste utviklingen av korona-spredning i Norge, har Amedias konsernledelse besluttet at medarbeiderne i konsernet ikke skal delta på store arrangementer den kommende tiden», skriv Dahl Kaartinen i innlegget som Medier24 har fått tilgang til.

Også Polaris Media droppar LLA sitt årsmøte og SKUP-konferansen.

– Dei bør utsetja det, for sjølv om det er fire veker igjen, er det mange andre arrangement som avlyser for å unngå auka smitte. Me har vore tydlege på det, og med våre retningslinjer passar det ikkje å delta, seier konsernsjef Per Axel Koch til Medier24.

Sat langt inne

Dahl Kaartinen i Amedia kommenterer saka slik overfor Medier24:

– Det vert sett på som ein for stor risiko. Det er etter føre var-prinsippet, og det er naturleg at ei smittespreiing kan gi store driftsmessige konsekvensar for oss som aktør.

– Utgangspunktet er at ingen frå oss deltek, men så er det kanskje nokon som ynskjer å diskutera dette, legg ho til.

Ho seier det var planlagd å senda om lag 20 personar til LLA, men Dahl Kaartinen har ikkje oversikt over kor mange som skal til Skup.

– Det har me ikkje oversikt over, men det er ikkje ein vesentleg del av våre medarbeidarar, seier ho.

– Sat det langt inne?

– Ja, absolutt.

I meldinga sendt til dei tilsette står det at dei tek nye avgjersler om gjennomføringa av interne samlingar og eksterne arrangement, som Nordiske Mediedager i Bergen 6.–8. mai, når datoane nærmar seg.

– Stussar litt over det

Styreleiar Silje Sjursen Skiphamn sa til Medier24 søndag at dei ikkje har planar om å utsetja Skup. Dei hadde krisemøte om situasjonen fredag. Ho reagerer på avgjersla til Amedia.

– Eg stussar litt over det. Det verkar overivrig å ta den avgjersla så lang tid i førevegen. Eg stussar over at dei ikkje følgjer råda til helsemyndigheitene, som anbefaler at arrangementet går som planlagt, seier Sjursen Skiphamn til Medier24.

Ho peiker på dagens framlegging av siste risikovurderingar, kor smitteekspert Preben Aavitsland ved Folkehelseinstituttet sa det ikkje er vits å avlysa arrangement riktig enno.

Sjursen Skiphamn si oppteljing viser at Amedia har om lag 52 påmelde til gravekonferansen.

– Fryktar du dominoeffekt?

– Ja, det er klart eg gjer det. Eg oppmodar konserna til å ha is i magen. I likskap med oss bør ein følgja anbefalingane som kjem frå helsemyndigheitene.

Andre konsern avventer

Medier24 har måndag vore i kontakt med både NRK, TV 2, NHST og Schibsted. Ingen av dei har innført same tiltak som Amedia, men følgjer alle med på situasjonen.

Sarah Willand er organisasjonsdirektør i TV 2. Ho kommenterer det slik:

– Me har ikkje bestemt oss endå, men me kjem til å ta ei avgjersle tidleg denne veka. Uansett kjem me ikkje til å senda alle som er påmeldt, så er det i så fall snakk om å senda eit betydeleg redusert tal menneske, seier TV 2 sin Sarah Willand til Medier24.

Kommuneoverlege Sigmund Skei i Tønsberg fortel til Medier24 at dei har hatt jamlege samtalar med arrangørane, og at det per no ikkje er grunnlag for å avlysa.

– Men det er berre vårherre som kan sjå så langt fram i tid. Per i dag er det ikkje grunn til å avlysa, men ting kan endra seg, seier han.

– Er det best å vera føre var eller bør ein sjå det an?

– Eg ville tenkt at ein bør sjå det an. Dei som er friske kan gå, og dei som er sjuke, bør halda seg heime, seier han.

– Trist

Generalsekretær Tomas Bruvik i Landslaget for lokalaviser (LLA) tykkjer det er synd at Amedia-tilsette ikkje får reisa på årsmøtet deira.

– Det er trist for medarbeidarane deira og keisamt for alle som har gleda seg til å få fagleg påfyll, at dei ikkje får reisa, seier han til Medier24.

– LLA går som planlagt. Me hadde eit ekstraordinært styremøte på fredag, og følgjer råda frå helsemyndigheitene, legg han til.

Dei har også vurdert å utsetja det, men det går heller ikkje av praktiske og økonomiske omsyn, seier Bruvik.

LLA varslar nytt styremøte tysdag.