Konkurrenten etter Amedia-oppkjøpet: – Står att å sjå om dei bemannar opp

– Nye eigarar betyr ikkje nødvendigvis at kontoen vert fylt opp, seier Fridtjof B. Nygaard, redaktør i Lister24 til Medier24. Han ynskjer Amedia velkommen til Agder.

Ole Alexander Saue

Publisert 28.11.2018 - 09:06

Denne artikkelen er over to år gammel.

Tysdag slapp bomba om at Amedia kjøper opp Nordsjø Media og deira ni lokalaviser i Rogaland og Agder.

Summen konsernet måtte ut med er ukjent, men Nordsjø Media har stadfesta overfor Medier24 at dei vurderte fleire kjøparar.

– Me har konkurranse uansett, og at det er sunt. Eg ynsker Amedia veldig lukke til med å drive dei avisene, seier Nygaard til Medier24.

– No står det att det å sjå om dei oppbemannar i Lyngdals Avis og Avisen Agder, som me konkurrer med, seier han vidare.

– Betyr ikkje at kontoen vert fylt opp

Lyngdals Avis har gått i minus i fire år på rad, og har ei samla gjeld på ein dryg million kroner. I 2017 tapte dei 390.000 kroner før skatt.

Avisen Agder, derimot, har lagt bak seg to positive driftsår og gjekk i 2017 og 2016 høvesvis 1 og 2,5 millionar kroner i pluss.

– Lyngdals Avis er ingen gullgruve, og Avisen Agder er ei avis folk er glad i. Det står att å sjå om eigarane vil pøse ut nye pengar. Nye eigarar betyr ikkje nødvendigvis at kontoen vert fylt opp, seier Nygaard til Medier24.

– Som redaktør i Lister må gjera vårt aller beste for at lesarane føretrekka oss. Det er ikkje et lite konsern me har i ryggen, heller, seier han.

Klubbleiar i Avisen Agder, Trine Fladstad, tok imot nyheita om oppkjøpet samstundes som det vart sendt ut pressemelding tysdag. Ho beskreiv seg sjølv som både lamslått og overraska over beskjeden, men er glad det var akkurat Amedia som overtok.

Trine Fladstad, klubbleiar Avisen Agder.

– Schibsted-alternativet ville vore mykje verre. Ein må berre prøve å tenkje positivt. Dei driv med lokalaviser frå før, men som sagt – me er veldig overraska og lamslåtte, i og med at det kom så overraskande på, sa Fladstad til Medier24 tidlegare tysdag.

– Fellesredaktør svekkjer ikkje mangfaldet

Nygaard, som har vore i Schibsted-systemet i over 20 år, forstår ikkje kvifor ho skulle meine det.

– Eg er veldig nøgd med å vere i Schibsted. Eg har vore her sidan 1997, og det har alltid vore knakande godt her. Amedia har si profil, kor dei vel å kjøpe opp mange lokalaviser. Det er bra, for dei er stødige som få, seier han.

– I Schibsted har det vore diskusjonar om det å ha éin fellesredaktør går utover mangfaldet. Det gjer det ikkje. Ei lokalavis er ei lokalavis uansett, seier han.

– Kan det ha negative konsekvensar at eit konsern får så stor innflytelse?

– Ein kan garantert finne noko negativt, men det er ikkje eg så oppteken av. Eg er oppteken av at dei har ein eigar, i staden for å bli lagt ned, seier han.

Nygaard vart ikkje overraska over nyheita då han las det på Medier24 tysdag.

– Det var ikkje uventa. Dei har ved si profil vist at dei er interessert i å kjøpe opp aviser, seier han.