Desse damene skal styre den nye Sogn Avis-fronten: – No køyrer me Tesla, før hadde me ein gamal Lada

I september vart det kjent at lokalaviskonsernet Amedia kjøper opp Sogn Avis. Tysdag var avisa, som har hovudsete i Leikanger i nye Vestland fylke, lansert i ny drakt.

I tillegg har avisa kome seg fullt over på Amedia-systemet, med teknologien og verktøya det fører med seg, og sett saman eit frontsjef-team som skal sørgja for vekst og nye lesarar for avisa.

– Dette vil gi oss utruleg store fordeler. Alt me er blitt presentert er heilt fantastisk. Me byrjar med det enklaste, og så byggjer me oss oppover på dei verktøya som kan brukast på nettsida. Slik kan me laga ei dynamisk nettside, seier konstituert redaktør Eli Grotle til Medier24.

Arbeidskrevjande

Mangeårig redaktør Jan Inge Fardal slutta i vinter for å bli redaktør i Nynorsk Pressekontor. Inntil vidare er Grotle konstituert, før stillinga etter kvart blir lyst ut.

– No køyrer me Tesla, før hadde me ein gamal Lada, seier ho om dei nye digitale verktøya.

– Er det vanskeleg å koma seg over frå Lada-en til Tesla-en som sjølvstendig lokalavis?

– Ja, me blir for små. Å stå på eigne bein i den digitale utviklinga, og utvikla eigne løysinga, har ein ikkje sjanse til, seier ho.

– Overgangen har vore veldig arbeidskrevjande for alle, og me har hatt full opplæring på alle nye system. Alt måtte lærast på nytt, seier Grotle vidare.

Med Amedia i ryggen følgjer også krav. For å ta avisa vidare og få det meste ut av innhaldet har avisa sydd saman eit frontsjef-team beståande av dei fire kvinnene Keth Øren, Sigrid Nese Thue, Wenche Schanke Eikum og Renate Sæle.

Avslappa forhold til kvinnedominans

Øren, som kjem frå jobben som vaktsjef, er spent på si nye rolle.

– Eg ser det er mykje krav og forventningar til frontsjef-rolla i Amedia sitt system, med omsyn til digital vekst og å vera gode på nett. Det er ein krevjande jobb, men det er veldig spanande å driva med «nett først»-strategi og nå ut til nye, unge målgrupper me har sett føre oss å få inn. Det er mykje omstilling her, seier ho.

– Sogn Avis har eit stort potensial i dette her. Det gler eg meg til å ta fatt på, legg Øren til.

– Og så får du eit frontsjef-team med fire damer, kva tenkjer du om det?

– Eg har heilt avslappa forhold til det, i 2020 burde ikkje det vera ein sensasjon at eit leiarteam i ei verksemd er berre damer. Det viser at me har ein redaksjon med god kjønnsbalanse totalt sett. Damer i ulike aldrar tek ansvar dei også, og har lyst til å vera i front, med ambisjonar. Det tykkjer eg er bra, seier Øren.

– Gode tilbakemeldingar

Sogn Avis-redaksjonen består no av åtte damer og sju menn.

Øren har arbeidd i Sogn Avis sidan 2006, og som vaktsjef sidan 2014.

– Me ser fram til den nye, digitale, verda. Dette gir oss eit løft, og eg har hatt med meg medarbeidarar som har vore veldig motiverte og gira for dette. Dei har sett i gang og bretta opp ermene, seier ho.

Redaktør Grotle fortel om gode tilbakemeldingar frå lesarane. Både papiravisa og nettavisa går gjennom betydelege endringar om dagen.

– På nettavisa har tilbakemeldingane vore veldig gode. Folk tykkjer det har blitt ei meir ryddig avis, og me har til dømes moglegheit til å flytte og løfte fram saker, seier ho.

Sogn Avis i fjor: Papir først

No er utfordringa å få dei drygt 7.000 digitale abonnentane over på det nye aID-systemet til Amedia.

– På tre dagar har over 4.000 gjort det allereie, seier Grotle.

Sogn Avis sin rekneskap for 2019 er endå ikkje offentleg, men avisa fekk i 2018 eit resultat før skatt på 2,4 millionar kroner og ein omsetnad på 41,6 millionar kroner.

– Me har ikkje flagga den digitale satsinga like hardt som andre, og me har hovudfokus på papir. Me følgjer med digitalt, men me publiserer først og fremst for papir, sa dagleg leiar Leif Johannes Lunde i Sogn Avis til Medier24 i slutten av juni.