Stadig fleire aviser innskrenkar Retriever-tilgangen: 110 aviser har luka ut «gratispassasjerar»

– Det er vanskeleg for oss å spå kva som skjer i framtida, men me har ein tett dialog med media for å få til ei god løysing, seier sjefen Espen Viskjer i Retriever.

Publisert 09.10.2019 - 07:13

Denne artikkelen er over to år gammel.

Fleire og fleire aviskonsern har dei siste åra teke grep for å hindra tap av brukarinntekter ved å avgrensa tilgangen til innhaldet i arkivtenester i verktøy som Retriever, Mynewsdesk, M-Brain og Meltwater.

Dagens Næringsliv har for lengst meld seg ut av den mest populære tenesta, og gjekk i fjor til søksmål mot Retriever for å det dei meiner er ulovleg distribusjon av innhald.

I vinter innførte både Schibsted, Polaris, Amedia og Hegnar Media 48 timar forseinking på innhaldet før det vert synleg i arkivtenesta.

Førre veke annonserte Schibsted at du no er nøydd til å vera betalande abonnent for å lesa lukka nettinnhald frå deira abonnementsaviser – Aftenposten, Bergens Tidende, Stavanger Aftenblad og Fædrelandsvennen – i slike verktøy.

– Me veit kva som har skjedd i mediemarknaden dei siste åra, så her handlar det om å tenkja nytt og utvikla seg vidare, seier Thomas Hovde, salssjef for bedriftsmarknaden i Schibsted, til Medier24.

Han meiner bransjen kan ha gjort marknaden ein bjørneteneste ved å ikkje fornya gamle avtalar med desse selskapa.

– Avtalene me har hatt til no bere preg av at dei er gamle og laga i ei tid med ein annan forretningsmodell. Det har skjedd ekstremt mykje sidan det, og medieovervakarane og deira kunder tykkjer nok det er fint at det har vore som det har vore, kor prisen for innhald har vore låg. Kanskje burde me ha teke tak i dette tidlegare, slik som både Dagens Næringsliv og VG+ har gjort, seier Hovde.

– Skulle gjerne sett full tilgang

No har kundar av Retriever avgrensa tilgang til 110 norske abonnementsaviser som i det siste aktivt har gått inn for å luka ut «gratispassasjerar».

– Dette er ei utvikling me har sett over fleire år, og etter store endringar i medieøkonomien har inntektsmodellen òg endra seg. Difor ynskjer media å påverka korleis innhaldet blir vist i tenester som Retriever, seier dagleg leiar Espen Viskjer i Retriever Norge til Medier24.

– Fryktar de framtidige grep som vil svekkje tilbodet til Retriever?

– Det er vanskeleg for oss å spå kva som skjer i framtida, men me har ein tett dialog med media for å få til ei god løysing. Det er ikkje ein ubetydeleg sum pengar me betalar for innhaldet, så det er ikkje slik at me gjer dette kostnadsfritt.

– Korleis er tilbakemeldingane frå kundar?

– Det er klart at kundar av Retriever ynskjer å lesa det aller meste, og me gjer det me kan for å gi dei den tilgangen. Då det ikkje vert mogleg skulle kunden gjerne sett at dei hadde full tilgang, men det viktigaste er at me sørgjer for ei god medieovervakingsløysing – og det gjer me sjølv om ein ikkje får lesa alt, seier Viskjer.

Mentor Medier: – Må ta ei vurdering

Blant dei konserna som ikkje har gjort grep er TUN Media – med sitt flaggskip Nationen, og Mentor Medier, som eig mellom anna Vårt Land og Dagsavisen.

– Generelt er me opptekne av å byggja opp brukarinntektene digitalt, og det er vårt hovudsatsingsområde. Sjølvsagt er me opptekne av det. Samstundes har me ikkje sett det som ei stor utfordring for oss førebels. Me skal ta ei vurdering på det seinare, seier konsernsjef Per Magne Tveiten i Mentor Medier til Medier24.

Administrerande direktør Christian Samuelsen i Klassekampen.

– Det er ein balansegang mellom å ynskja så brei distribusjon som mogleg, samstundes som me må passa på at me tek vare på forretningsmodellen vår. For oss er det ei avveging som må gjerast, legg han til.

Heller ikkje Klassekampen har sett Retriever-distribusjonen som eit stort problem.

– Me har ikkje merka noko til det, men kanskje me berre har målt for dårleg, seier administrerande direktør Christian Samuelsen i Klassekampen til Medier24.

Han legg til:

– Nokre stader kan nok dette misbrukast og gå veldig utover inntektene til aviser. Dersom folk får tilgang til aviser dei ville abonnert på, gratis gjennom universitet og liknande, så skjønnar eg det er eit stort problem – dersom det vert snakk om store summar.