Her sensurerer NRK «blasfemisk inn­hald»: – What?! Kva driv dei med?

Torsdag sende NRK ein Urix-spesial om blasfemilova i Pakistan, som handla om Asia Bibi som vart dømt til døden for blasfemi, og sidan vart frikjent.

I dokumentaren er Qari Saleem, mannen som meldte kvinna til politiet, intervjua. Då han skal gje att kva kvinna har sagt, vel filmskaparane å sladda munnen hans, og fjerna lyden og teksta med «(blasfemisk innhold)».

Dokumentaren er eksternt produsert, og det er filmskaparane som har sladda intervjuobjektet. NRK har vald å respektera deira ynske. 

– Vesentleg informasjon

– Då eg såg det tenkte eg «what?! Kva driv dei med?», seier konserntillitsvald Eva Stenbro i Amedia. Ho reagerte ved å leggja ut eit innlegg på Facebook om det ho såg.

Stenbro reagerer sterkt på at NRK vel å ikkje visa ytringa til kvinna, som er heile premissen for dokumentaren.

– Når sjåaren skal gjera seg opp ei meining om kor krasse fråsegna hennar var, er det vesentleg informasjon. Ho fekk ein tøff dom, og då ventar ein ho må ha sagt noko heilt frykteleg og forferdeleg, seier Stenbro vidare.

Stenbro meiner media har eit spesielt ansvar for å stå opp for ytringsfridomen.

– Kva med omsynet til ho som er dømt til døden? Kva med å stå opp for hennar rett til å seia det ho vil? Mediebedrifter bør stå opp for frie ytringar, seier Stenbro.

– Stor risiko

Utanrikssjef Sigurd Falkenberg Mikkelsen i NRK forklarar avgjersla med tryggleiken til vedkommande som uttalte seg.

– Sjølv om det er indirekte ville vedkommande vore i stor fare, dersom han fekk snakka fritt og me hadde publisert fråsegna, seier han til Medier24.

Han legg til:

– Det er òg stor risiko for filmskaparane om me hadde publisert det. Dei har vore i felt og laga ein modig dokumentar, og dette er òg med omsyn til dei. 

– Kunne gjort greie for det

Vidare meiner Stenbro at media bør vera opne om kvifor dei sladdar, på lik linje med openheit rundt bruk av anonyme kjelder. 

Der tek Falkenberg Mikkelsen og NRK sjølvkritikk.

– Me ser i ettertid at me med fordel kunne gjort greie og forklart bakgrunnen for dette. Eg vil understreka at dette er ein modig film, som belyser eit vanskeleg og brennbart tema. No skal me gå inn i etterkant og få lagt opp ein plakat på slutten, slik at framtidige sjåarar slepp å spørja seg sjølv om kvifor me har vald denne løysinga.

Medier24 er kjent med kva Asia Bibi skal ha sagt, men har vald å ikkje publisera det.