I Polaris og Amedia er det 110 redaktørar. Berre 26 er kvinner. – Ikkje bra nok!

Ein gjennomgang Medier24 har gjort av totalt 110 redaktørar i Amedia og Polaris viser at tre av fire redaktørar i lokalaviskonserna Amedia og Polaris er menn.

Av totalt 110 redaktørar er det berre 26 kvinner.

– Dette tykkjer eg ikkje noko om. Det er 50 prosent kvinner i landet, og det er mange kvinner i konsernet, så det burde absolutt vore plass til fleire kvinnelege leiarar, seier konserntillitsvald i Amedia, Eva Stenbro, til Medier24.

– Har kvinner moglegheit?

Amedia er landets største lokalaviskonsern med 74 titlar. Polaris Media, som er delvis eigd av Schibsted, er hakket mindre med 39 titlar i Norge.

Stenbro seier til Medier24 at tillitsvalde i Amedia nyleg har adressert problematikken overfor leiinga i konsernet.

– Eg var klar over at balansen var skeiv, men ikkje so skeiv. Dette er noko me følgjer med på. Me har stilt spørsmål ved opprykk. Har kvinner moglegheiter til å komma inn i leiarstillingar i Amedia? Og korleis held ein på gode kvinner i leiarstillingar, spør Stenbro.

– Sender dårlege signal

Også konserntillitsvald Rune Setsaas i Polaris Media er lite imponert over kjønnsbalansen i sitt konsern.

– Dette er ikkje bra nok. Enkelt og greitt, seier han til Medier24.

Han seier at temaet er noko som er blitt teke opp og diskutert, og han peiker på at det blir tilsett fleire kvinnelege redaktørar no enn tidlegare.

– Dagens kjønnsbalanse sender dårlege signal. Optimalt burde det vore 50-50, og ein god kjønnsbalanse er viktig fordi det sender eit signal om at det også er plass til kvinner som ynskjer å bli redaktør, seier han.

Trur kjønnsbalansen påverkar arbeidsmiljø

Stenbro i Amedia seier kjønnsbalanse er viktig av fleire grunnar. Først og fremst på grunn av likestilling, og at kvinner skal ha like moglegheiter som menn. Deretter meiner ho kan ha påverknad på både arbeidsmiljø og det redaksjonelle innhaldet.

– Ein del prinsipp er universelle, men kvinner og menn bringar ein del ulike ting til bordet. Under metoo stilte me spørsmålet om det hadde gått så langt dersom som ein hadde hatt fleire kvinnelege leiarar? Eg trur arbeidsmiljø har litt med kjønnsfordeling å gjera. Om ein har begge representert, får folk eit arbeidsmiljø ein kjenner seg igjen i, seier ho.

Vidare peiker ho på at kvinner og menn tenkjer ulikt – også redaksjonelt.

– Kvinner les til dels litt andre saker enn menn gjer. På vårt nivå, på nyheiter, er det kanskje smart å ha jamt med kvinnelege redaktørar, som kan sørgja for at det stoffet vert prioritert. Eg trur det er enklare å prioritera ting som ligg hjarta nært, seier ho.

Polaris varslar grep

Konsernsjef Per Axel Koch i Polaris Media seier til Medier24 at kjønnsbalansen blant redaktørane i konsernet ikkje er godt nok, men at det har vore ei lang rekkje kvinnelege tilsetjingar i det siste. 

Han viser til redaktørane i Bladet, Fosna-Folket, Sunnmøringen, Fjordabladet, Vikeblad Vestposten, som alle har kvinneleg redaktør.

– Eg trur talet vil auka på sikt, men det er ingenting å diskutera at det er for lågt, seier Koch til Medier24.

– Me har ikkje hatt noko internt program, og me tek kvar tilsetjing for seg. Me forsøker å få fram gode talent, både kvinner og menn, i fellesskapet. Me er opptekne av intern rekruttering, så me får berre vidareutvikla kandidatar og få så mange kvinnelege kandidatar som mogleg.

– Eg var ikkje klar over at talet var så lågt som 25 prosent, då det er for lågt. Som følgje av dette kjem me til å tenkja gjennom kva me kan gjera med denne kjønnsbalansen. Amedia er på same nivå, så det har nok litt å gjera med at folk har sete lenge i jobbane sine, seier han vidare.

Tilsette åtte kvinnelege redaktørar i fjor

Medier24 har onsdag og torsdag forsøkt å få eit intervju med konsernsjef Are Stokstad i Amedia om temaet. Han viser til HR-direktør Lise Kaartinen for kommentarar.

– Me kan absolutt ikkje seia oss nøgd med det. Likevel har me litt meir gledelege tal når det gjeld nytilsetjingane me har gjort i 2019, seier ho og viser til at både Hadeland, Ringerikes Blad, Svelvikposten, Nordstrands Blad, Ringerikes Blad, Aust-Agder Blad, Kvinnheringen, Sogn Avis fekk kvinneleg redaktør i 2019.

– Dette er noko me, i likskap med andre i bransjen, har fokus på. Målsetjinga er definitivt å auka talet, og det har me klart med nytilsetjingane i 2019, legg ho til.

– Har de konkrete måtar å jobba på for å både rekruttera, og halda på, flinke kvinner?

– Det første prinsippet me har innført er at alle stillingar skal lysast ut. Det er ikkje eit unikt – men eit viktig – prinsipp om at alle skal ha moglegheit til å søkja på våre stillingar. I tillegg er det ei tydleg forventning om at ein har med kvinner i finalerundane der det let seg gjera.

– Kvifor er det viktig med kjønnsbalanse?

– Frå mitt perspektiv handlar det om at ein må representera ulike samfunnslag – både kjønn, alder, erfaring og etnisitet. Me har over 43-44 prosent kvinner tilsett i konsernet, så det er rart å ikkje ha som mål at det skal gjelda på leiarnivå.