Polaris pustar Amedia i nakken: Berre 100.000 abonnentar skil konserna

Medan børsgiganten Schibsted tronar på topp med sine 1,3 millionar abonnentar vert det stadig tettare kamp mellom lokalaviskonserna Amedia og Polaris Media.

Etter ei årrekkje med ein stabil, organisk, vekst har konsolideringar i bransjen skapt store endringar i talet på abonnentar for dei ulike konserna.

Medan Amedia nyleg har teke kontroll over Nordsjø Media sine aviser på Sørvestlandet, har Polaris teke eit betydeleg jafs av den svenske marknaden med 51 prosent eigarskap i Stampen Media med totalt 230.000 abonnentar i nabolandet.

– Selskapet vårt har ein heilt annan kraft i marknaden no, seier Polaris Media-toppsjef Per Axel Koch.

Amedia vil ikkje vera noko verre.

– Me er sterkare enn nokosinne, seier administrerande direktør i Amedia, Are Stokstad. 

– Lukke til med kriseramma konsern

Stadig er Amedia den soleklare største lokalaviseigaren i Norge med sine 73 lokale titlar, med atterhald om at Sogn Avis vert godkjent av konkurransetilsynet. Totalt har dei over 640.000 norske abonnentar – over dobbelt så mange som Polaris, som ved nyttår vil ha om lag 312.000 etter sine oppkjøp på Sørlandet.

Delvis Schibsted-eigde Polaris sitt ferske oppkjøp av Stampen gjer likevel at dei tek kraftig innpå Amedia totalt sett.

– At Polaris kjøper eit kriseramma konsern i Sverige ynskjer me dei oppriktig lukke til med, seier Stokstad til Medier24.

• Les også: Blodrøde tall for Polaris' nye selskap: Slik blir snu­operasjonen

At det nettopp er eit kriseramma selskap er ingen hemmelegheit. Polaris' siste kvartalsrapport for 2019, som vart lagt fram i august, viste at inntektene i Stampen stuper ti prosent på eitt år, annonseinntektene går ned 17 prosent og papiromsetnaden er ned 18 prosent. 

– Me meiner me kan bidra til å snu utviklinga i Stampen, så det er spanande å jobba med den type problemstillingar. Dersom me lukkast med det, vert det ei god investering ettersom me betalte lite for å komma inn, seier Koch.

I grafane under ser du styrkeforholda mellom Polaris, Amedia og Schibsted – både i Norge, og totalt (inkludert Sverige). 

Schibsted: – Eit poeng å vera stor

Koch i Polaris fortel til Medier24 at dei fekk seg ein tankevekkar då Amedia snappa opp Nordsjø Media – utan at dei vart invitert inn i kampen.

– Det vil nok ikkje skje igjen. Eg føler me har ein god plattform no, seier han til Medier24.

– Men no er det viktig å visa at me får integrert Agder-avisene på ein god måte og snudd utviklinga i Sverige. Det er to store oppgåver, så 2020 vert viktig.

Stokstad i Amedia meiner samarbeidet mellom Schibsted og Polaris vert endå tydlegare med siste oppkjøp. 

– Det som er tydeleg er at Schibsted bruker Polaris som ei hamn for sine lokale- og regionaviser. Salet av Fædrelandsvennen understrekar det strategiske samarbeidet, seier han.

Den analysen er ikkje konserndirektør for Schibsted Media, Siv Juvik Tveitnes, samd i. 

– Det har me absolutt ingen planar om. Her får Are Stokstad berre spekulera, seier ho til Medier24.

Juvik Tveitnes er likevel tydeleg på at konkurransesituasjonen har endra seg det siste året.

– Og det er eit poeng å vera store her – spesielt innanfor annonse og distribusjon, seier ho.

Trur Schibsted sit stille i båten

Førsteamanuensis ved Handelshøyskolen BI, Erik Wilberg, er ekspert i medieøkonomi. Han trur det norske mediekartet byrjar å bli ferdig teikna opp.

– Det er ikkje mykje meir ein kan gjera. Det er å kjøpa opp frittståande aviser – og då trur eg det vil bli ein kamp mellom Amedia og Polaris, då Schibsted ikkje vil kjøpa opp meir smått, seier han.

– Kva trur du Schibsted kjem til å gjera med lokal- og regionavisene sine framover?

– No har dei selt Fædrelandsvennen, men eg trur det forretningsmessig passar betre med Aftenbladet og Bergens Tidende enn det gjorde med Fædrelandsvennen i tillegg. Eg trur dei sit stille i båten utan å gjera så veldig mykje meir framover, seier han.