Amedia-bygget i Oslo.
Gorm Kallestad / NTB scanpix
Amedia permitterer 11 tilsette
Sentera for annonseproduksjon i Amedia tek grep som følgje av koronakrisa.
Denne artikkelen er over to år gammel.
– Det er forferdeleg trist å gi den beskjeden, seier dagleg leiar Ole-Rayner Dietel i Amedia Annonseproduksjon og Amedia Ressurs Harstad til Medier24.
Selskapa gjer kreative jobbar og produserer annonsar for nærare 100 aviser i Amedia og Polaris.
Som følgje av svikt i annonsemarknaden har dei no vore nøydd til å permittera tilsette frå og med tysdag denne veka.
– Det er eit forrykande fråfall av jobb – botnen har falt ut av marknaden – og me opplever massevis av kanselleringar, flytting av jobb, og få nye jobbar, seier Dietel.
Selskapet har 52 tilsette fordelt på to kontor i Tønsberg og Harstad. Det er personar knytt til produksjonen som no blir skadelidande, seier Dietel.
Medier24 skreiv førre veke at Amedia-eigde Bodø Nu måtte permittera heile marknadsavdelinga si.
Kommunikasjonssjef Stig Finslo i selskapet seier til Medier24 at det vert jobba hardt i alle Amedia-selskap for å møta utfordringane som kjem. Han seier at permitteringar er eit aktuelt verkemiddel for fleire.
