Denne Aftenposten-framsida får Høgre-politikarar til å rase

I fredagens papirutgåve av Aftenposten kan du lese på framsida at «Et byrådsskifte vil koste denne familien 46.000». I saka, på side 4 og 5, fortel avisa om dei ulike Aktivitetsskolen-tilboda (AKS) til partia i Oslo kommune.

– Som utjamningspolitikk fungerer gratis Aks. Det gjekk frå å vere noko som var frivillig og berre nokre av borna gjekk på, no er det blitt noko alle borna gjer saman, fortel Svein Thore Kloster til avisa.

Saman med sine tre born har han stilt opp som «case» for ein typisk familie som får gratis Aks med sitjande byråd. På andre sida har Kristoffer Øksnevad stilt opp som case for ein typisk familie som ville fått gratis Aks dersom dei borgarlege fekk bestemme. Dei ynskjer å gi gratis Aks til låginntektsfamiliar – uavhengig av bustad. Dei raudgrøne gir gratis Aks til familiar basert på bustad.

Det avisa ikkje fortel om i fredagens papiravis er at Kloster er på 12.-plass på lista til Sagene SV. Det får Høgre-politikarane Gaute Kandal Hoel og Mathilde Tybring-Gjedde til å ta til kraftig motmæle på Twitter. Også leiar i Oslo Høgre, Heidi Nordby Lunde, reagerer:

– Det gjer ikkje akkurat saka betre. Det blir som salt i såret at det er ein kandidat frå SV som støttar eigen politikk. Det vert veldig spesielt, seier ho.

Tybring-Gjedde skriv på Twitter at det er «helt surrealistisk», at ho er «utrolig skuffet» og at ho har «fortsatt ikke ord».

– Alvorleg

Leiar Heidi Nordby Lunde i Oslo Høgre reagerer i tillegg sterkt på det ho meiner er ein grov faktafeil på framsida, kor det står at «hvilken side av gaten du bor på, kan avgjøre hvilket tilbud du får».

– Det må ha skjedd ein alvorleg glipp. Det er bra med eit kritisk blikk på politikk, men her er det ein grov faktafeil, seier ho til Medier24.

– Det er særleg alvorleg under ein valkamp kor ein får lite tid til å rette opp i etterlatne inntrykk med faktafeil over heile framsida til eit av landets største aviser, legg ho til.

Redaksjonssjef Jostein Ihlebæk i Aftenposten seier til Medier24 at han forstår reaksjonen på formuleringa.

– Den er meint å peike på dagens ordning, men me ser at det kan lesast som ein konsekvens av eit byrådsskifte. Det kjem me til å legge inn ei presisering om i morgondagens avis, seier han.

Visste ikkje at kjelda var politikar

Etter reaksjonane på Twitter torsdag kveld la i tillegg Aftenposten inn presiseringa «Kloster står på 12.-plass på SVs valgliste i bydel Sagene» i åttande avsnitt i brødteksten.

Ihlebæk fortel at dei ikkje kjente til Kloster si SV-tilknyting då dei lagde saka.

– Det skulle me sjølvsagt visst i forkant av publisering. Då burde det òg stått i teksten. Me har føyd til i nettsaka at vedkommande er på lista til Sagene SV, seier han.

– Hadde de brukt han case om de hadde visst at han sto på SV-liste?

– Det vert hypotetisk, men det tvilar eg på. I så fall hadde me skrive det. Men me hadde nok takka nei, seier han.

– Var det SV som spelte inn «caset»?

– Det kjenner eg ikkje til, seier han.

– Skarpt vinkla

Nordby Lunde meiner òg at saka er svært einsidig.

– Den eine familien Aftenposten har grave opp som får hjelp, har to foreldre i arbeid. Det er mange andre i kommunen med låg inntekt som ikkje får den hjelpa – men bur på feil adresse.

Vidare meiner ho Aftenposten kunne fått fram nyansane på ein betre måte dersom dei hadde hatt med begge familiane på framsida, for å vist skilnadane på politikken.

– Ein familie som tener litt over ein million er kanskje ikkje dei som har mest behov, seier ho.

I artikkelen som er publisert på nett fredag morgon har dei vald å vinkle på begge familiane. Ihlebæk står likevel for valet dei gjorde med papirutgåva.

– Nett og papir er to ulike plattformer. Det er eit journalistisk val me har gjort. Me er samd i at det er ei skarpt vinkla førsteside, men me meiner det er eit legitimt fokus, seier han.