Tove Nedreberg, administrerande direktør i Adresseavisen AS. Her frå LLA sitt landsmøte i Trondheim våren 2015.
Opptur for Adresseavisen i 2018. No har brukarinntektene snart passert annonseinntektene
– Eg trur generelt at brukarinntektene vil utgjer ein større del av finansieringa av journalistikken framover, seier administrerande direktør Tove Nedreberg.
Med stabile inntekter og kostnadskutt frå 2017 til 2018, betra Adresseavisen driftsresultatet med knappe ti millionar kroner, og fekk resultat før skatt på 88,5 millionar kroner, etter om lag 40 millionar kroner i Finn-utbytte, kor trondheimsavisa eig 9,4 prosent.
«Resultatforbedringen knytter seg hovedsaklig til reduserte driftskostnader og økte brukerinntekter, som kompenserer for fallet i annonseinntekter på papir», skriv Adresseavisen i årsmeldinga.
– Me er godt nøgd med resultatet. Fleire ting gjekk betre enn venta, seier administrerande direktør Tove Nedreberg, og peiker mellom anna på abonnementsvekst og auka digitale inntekter.
– Det kompenserer for fallet i annonseomsetnaden på papir, som dessutan var lågare enn venta, legg ho til.
Adresseavisen
2018
2017
Endring
Omsetning
529,7 mill.
527,3 mill.
0.5 %
Driftsresultat
46,6 mill.
36,8 mill.
26.5 %
Resultat før skatt
88,5 mill.
78,9 mill.
12.1 %
Driftsmargin
8.8 %
7.0 %
25.9 %
Avisa har kutta dryge sju millionar kroner i kostnadar frå 2017 til 2018. Nedreberg peiker vidare på kutta i samband med spareprogrammet Adressa 2020/Polaris Media 2020 som ein medverkande årsak til resultatoppgangen.
– Det er ikkje til å leggje skjul på at kostnadskutt har vore naudsynt for å oppnå dette resultatet, seier ho.
Grafen over viser utviklinga i annonse- og brukarinntekter for Adresseavisen sidan 2011. Medan annonseinntektene var på full fart nedover frå 2010 og utover, låg brukarinntektene på staden kvil. No er brukarinntektene på full fart opp, medan annonsenedgangen stadig er på veg ned over – trass ein liten brems i fallet.
No er det nemleg berre 45,7 millionar kroner som skil annonseinntektene frå brukarinntektene. Berre sju år tidlegare var gapet på heile 249 millionar kroner.
Meir innhaldsmarknadsføring
For Polaris Media-konsernet i første kvartal sto brukarinntektene for 153 millionar kroner, medan annonseinntektene sto for 135 millionar kroner.
– Eg trur generelt at brukarinntektene vil utgjer ein større del av finansieringa av journalistikken framover, seier Nedreberg.
– Etter ein kraftig nedgang i 2016 gjorde me grep, og har no utvikla annonseprodukta. No har me satsa meir på annonsørinnhald og byrå, kor me driv meir med rådgiving, grafisk produksjon i tillegg til vising. Slik kan me tilby ein heilskapleg pakke til annonsørar.
– Trur du brukarinntektene vil passere annonseinntektene på sikt?
– Det reknar eg som sannsynleg, ja.
– Tør du spå når?
– Vi nærmar oss det, slik me har sett hos mange andre mediehus, seier ho.
4,3 millionar i løn til toppsjefane
Fallet i annonseinntekter skuldast i all hovudsak nedgangen på papir, medan digitale annonsar og innhaldsmarknadsføring bidreg til å stogge nedgangen.
«Annonsemarkedet fremover anses fortsatt som usikkert og det forventes at annonseinntektene på papir fremdeles vil falle mens det forventes en vekst i digitale annonseinntekter», står det vidare i årsmeldinga, signert styret i Adressa.
Administrerande direktør Nedreberg og sjefredaktør Kirsti Husby tok ut høvesvis 2,3 millionar kroner og 2 millionar kroner i løn i 2018.
Sjefredaktør Kirsti Husby i Adresseavisen.Ole Alexander Saue
