Ingen lokalaviser til Sommar­-OL i Japan: – Me burde kanskje ha reist

Akkrediteringslista til OL i Tokyo viser at Stavanger Aftenblad og Bergens Tidende er dei einaste avisene utanfor Oslo som sender journalistar til OL i 2020.

Ingen lokalaviser reiser nedover. Heller ikkje dei to største avisene nord for Dovre, Adresseavisen og Nordlys, sender journalistar til Japan.

Stolar på samarbeid 

Adressa trakk nyleg sin søknad, og vil heller støtta seg på 100 % Sport-samarbeidet til Schibsted og Polaris (Aftenposten, Bergens Tidende, Fædrelandsvennen, Adresseavisen, Stavanger Aftenblad, Sunnmørsposten, iTromsø og Romsdals Budstikke.)

– Me meiner det samarbeidet vil gi oss ei god dekning av OL for våre lesarar, seier sportssjef Charlotte Østby Sundberg i Adresseavisen til Medier24.

Sjølv har Adressa, som dekkjer Trøndelag, ei rekkje profilar som truleg vil reisa til leikane.

På herrelandslaget i handball finn ein trønderske stjerner som trenar Christian Berge og Sander Sagosen, som i 2018 vart kåra til verdas beste handballspelar.

– Me har ein god dialog med Aftenposten og dei andre media som dekkjer handball, så det føler eg meg trygg på at me får dekkja på ein god måte. Det er også mogleg å gjera ein del ting i forkant, seier ho.

I tillegg har ein individuelle utøvarar som maratonløpar Sondre Nordstad Moen og høgdehoppar Ingar Kiplesund som kan kvalifisera seg.

– Ikkje kapasitet

Heller ikkje Amedia-eigde Bergensavisen reiser nedover – til trass for ei rekkje lokale medaljekandidatar.

– Me kunne, og burde, kanskje ha reist, men med totalsituasjonen med alt me skal gjera i sommar har me ikkje kapasitet, seier sportssjef Tormod Bergersen i Bergensavisen til Medier24.

Blant dei lokale utøvarar som kan reisa ned til OL finn ein triatlon-løparane Kristian Blummenfelt, Casper Stornes og Gustav Iden, sandvolleyballstjerna Anders Mol, handballspelarane Eivind Tangen, Harald Reinkind og Håvard Haukenes, for å nemna nokon.

– Korleis skal de dekkja det?

– NTB, førehandsstoff, og så har me god kontakt med utøvarane via WhatsApp og andre kommunikasjonsmiddel.

– Men tenk om lokale utøvarar vinn OL-gull utan lokalavisa til stades?

– Me håpar at dei vinn OL-gull, og me har dekkja OL-gull frå Bergen tidlegare. Det vart ganske bra, seier Bergersen og viser til då skøyteløparane Sverre Lunde Pedersen og Håvard Lorentzen vann OL-gull i 2018.

– Det er spørsmål kor mykje eksklusivt ein får uansett. Kanskje nokre gode førehandssaker og bilete som ikkje alle andre har, men eg trur BA sine lesarar skal få ei god dekning av OL uansett, seier han.

Slik såg BA-sporten ut då skøyteløpar Håvard Lorentzen vann OL-gull i 2018. Med gullvinnaren på FaceTime i stova til foreldra. (Saka held fram under biletet.)

Får for lite igjen

I Vinter-OL i Sør-Korea i 2018 var det heller ikkje lokalaviser som reiste til meisterskapen, og leiar Reidar Sollie i Norske Sportsjournalisters Forbund er uroa over utviklinga.

– Det er beklageleg, seier Sollie til Medier24.

– Eg tykkjer det er ganske beskrivande. 2018-OL var første gong i moderne tid utan lokalaviser til stades, sjølv om mange hadde hatt interesse av å vera der.

– Me har fått tilbakemeldingar på at dei får for lite ut av det. Det har blitt så komplisert med så mange avgrensingar at ein får knapt tilgang til utøvarane utover konkurranse og tida like etter, seier han vidare.

Trur det handlar om ressursar

Kommunikasjonssjef Halvor Lea i Olympiatoppen har også registrert utviklinga, men vil ikkje trekkja konklusjonar om kva det vil ha å seia for lokal interesse.

– Det er vanskeleg å tolka dette i eit lokalt og regionalt perspektiv. Alle dei som reiser og dekkjer OL dekkjer alle utøvarane, så det er ikkje slik at VG, Dagbladet og Aftenposten berre dekkjer dei frå Oslo, seier han.

Han har sett utviklinga også i andre meisterskap.

– No er eg i Anterselva for VM i skiskyting, og me ser at den same utviklinga her. Me hadde mange fleire lokal- og distriktsaviser før – og den utviklinga er ikkje berre knytt til OL, og internasjonal sport generelt.

Han deler ikkje Sollie sin analyse om kvifor lokale og regionale media trekk seg ut frå meisterskapa. 

– Me har hatt den same mediestrukturen dei siste 20 åra. Me har pressetreff to dagar før konkurranse, og utøvarar tilgjengeleg like etter, seier han.

Lea trur det handlar om kostnadane.

– Men så kan det vera riktig at det er avgrensingar – om ein har ei forventing om at ein kan gå nærast inn og ut av hotella og møta den lokale utøvaren når det passar. Der er det stramt regime med akkreditering, men det er ein del av infrastrukturen i OL, seier han.