Korona på grave­konferanse: Journalistar frå Aften­posten, VG og Adressa til stades

Natt til onsdag sendte arrangørane av journalistkonferansen NICAR20, Investigative Reporters & Editors, ut ei pressemelding om at ein deltakar har testa presumptivt positivt for koronaviruset.

 – Den smitta har milde symptom og er venta å bli frisk igjen. Han er i 14-dagars karantene, som anbefalt av helsemyndigheitene, står det i pressemeldinga.

Den positive testen er sendt til Centers for Disease Control (CDC) for å få den bekrefta. Det kan ta inntil ei veke, og enn så lenge er resultatet berre rekna som «presumptivt positivt».

Ti norske journalistar var også med på konferansen i New Orleans, USA, i samband med eit Stup-kurs.

Deltakarane kom frå følgjande medium:

• Aftenposten (3)
• VG (2)
• Adresseavisen (2)
• Agderposten (1)
• Bergens Tidende (1)
• Trønder-Avisa (1)

Heime i 14 dagar

Personane frå Aftenposten er heime i karantene, opplyser nyheitsredaktør Tone Tveøy-Strøm Gundersen til Medier24.

Ho vil ikkje kommentera om dei skal testast eller har vore innom jobb etter at dei kom heim.

– Det er personalsaker, så det svarar eg ikkje på, seier ho til Medier24.

Ein Aftenposten-journalist Medier24 har snakka seier han er pålagt heimekontor i 14 dagar. Han er frisk, og veit ikkje om han er blitt eksponert for den smitta personen.

Sjefredaktør Gard Steiro i VG understrekar at ei rekkje tilsette har heimekontor og at det òg gjeld fleire av dei tilsette som var på NICAR.

– Ingen av dei har fått karantene, seier Steiro til Medier24.

Utover det kan han ikkje gå inn på detaljar rundt situasjonen.

Journalist i Agderposten skal testast

I Agderposten er ein journalist sett i karantene, opplyser sjefredaktør og administrerande direktør Øyvind Klausen til Medier24.

Personen skal også testast.

– Vedkommande var på jobb i går, men sit no heime i karantene innan situasjonen er avklart.

– Fryktar de utbrot på jobb?

– Me fryktar det ikkje, men me tek forholdsreglar. Ho jobbar heimanfrå i karantene til situasjonen er avklart.

Kom på jobb etter konferansen

Dei to personane frå Adresseavisen har fått beskjed om å halda seg heime i to veker, men føler seg førebels friske, og skal difor ikkje testast.

Den eine av dei to har vore ein snartur innom jobb, fortel han, men har sidan fått beskjed om bli heime.

Sjefredaktør John Arne Moen i Trønder-Avisa stadfestar at ein person i redaksjonen var på den konferansen.

– Vedkommande er sett i karantene, seier han.

Kursleiar John Bones såg ikkje meldinga om den positive koronatesten før han kom på jobb onsdag, men held seg heime framover.

Personen frå Bergens Tidende er stadig på ferie i USA, og har ikkje vore heime etter konferansen.