Schibsted tause om Adevinta-milliardar: – Bruk det på journalistikk, meiner redaktørar

Då Schibsted tidlegare i vår skilte ut si internasjonale rubrikkverksemd i selskapet Adevinta og børsnoterte det, selde konsernet aksjar for snaut 2,66 milliardar kroner, prisa til 78 kroner per aksje.

Kva pengane skal gå til er det knyt stor spenning til internt i Schibsted, og spesielt blant redaktørane er det eit ynskje om investering i journalistikk og teknologi knyt til den publisistiske delen av Schibsted.

Vil bruke dei neste månadane

Styreleiar i Schibsted, Ole Jacob Sunde, er løyndomsfull overfor Medier24 på spørsmål om kva det skal investerast i.

– Det verkar som at det at eit selskap får finansiell handlekraft er eit problem, og eg ser ikkje på det som eit problem, men som ei stor styrke at eit selskap får finansiell handlekraft, seier Sunde – like etter Schibsted si generalforsamling i auditoriet i Akersgata 55 fredag.

– Skal ein investere i journalistikk, nye marknader – eller i til dømes finansielle tenester og andre vekstselskap?

– No har me knapt fått pengane på bok, så eg tykkjer me skal få lov til å vurdere det dei neste månadane og åra, så me kjem ikkje til å kommentere direkte korleis me tenkjer rundt det, seier Sunde vidare.

Når Medier24 tek kontakt med redaktørane i Schibsted-avisene VG, Aftenposten, Fædrelandsvennen, Stavanger Aftenblad og Bergens Tidende er det ikkje overraskande «journalistikk» og «teknologi» som går igjen.

– Eg har ei lang ynskjeliste. Det som verkar openbert for oss, i abonnementsøkonomien, er at me må ha dei aller beste brukaropplevingane og journalistikken for å lukkast. Eg trur det er investeringsvilje i Schibsted for alle tiltak og idear som bidreg til å byggje lojalitet og engasjement hos våre lesarar, seier redaktør og administrerande direktør i Fædrelandsvennen, Eivind Ljøstad, til Medier24.

– Betydelege utfordringar på kostnadssida

Ljøstad held fram:

– Eg skulle òg hatt, og meiner me har bruk for, fleire journalistar. Men det er som å tru på julenissen, sjølv med milliardar i lommeboka.

– Som å tru på julenissen at konsernet satsar på fleire folk knyt til kjerneverksemda?

– Journalistikk er openbert ein del av kjernen. Samstundes har eg vore med såpass lenge at eg har lært å bli realistisk. Me har betydelege utfordringar på kostnadssida. Det gjeld òg dei neste åra, fordi mykje av vår økonomi er avhengig av print, som er på veg nedover. Difor vil me vere varsame med å auke kostnadsbasen, slik eg tolkar signala, seier Ljøstad.

Lars Helle, administrerande direktør og sjefredaktør i Stavanger Aftenblad, meiner det først og fremst er viktig med ein fornuftig bruk av pengane. Han legg til:

– Det ligg sjølvsagt i korta at dersom me i endå større grad kan få vist at me er eit publisistisk selskap, bør ein bruke dei fornuftig på å utvikle journalistikken og teknologien, seier Helle.

– Viktig sak for Schibsted

Teknologi, utvikling og vekst er noko Oslo-redaktørane Gard Steiro i VG og Espen Egil Hansen i Aftenposten òg ynskjer seg.

– Dette er ei spanande tid for Schibsted. Det er ei viktig sak for Schibsted-styret å velje ut ei retning dei trur på, seier Hansen til Medier24.

VG-redaktør Steiro følgjer opp:

– Dei siste åra har Schibsted investert mykje i teknologi som er heilt avgjerande for publisistane, og dei investeringane må halda fram. Med den teknologiske utviklinga me ser no, vil det kome nye investeringsbehov innanfor teknologi knyt til journalistikk. Det er mi forventning – og det trur eg òg vil skje.

Der har òg Ljøstad tru på.

– Det er lov å vere optimistisk på at det vert investert direkte i teknologi. Brukaropplevinga i våre abonnementsprodukt må bli betre enn dei er i dag. Det er det, saman med journalistikken, som byggjer engasjement og lojalitet, seier han.

– Ambisjonar

Etter at Schibsted skilte ut Adevinta er nyheitsmedier no det som står for den desidert største delen av omsetnaden i konsernet, medan dei nordiske rubrikkselskapa Finn, Blocket og Tori oppnår høgast marginar.

I 2018 omsette VG for 1,83 milliardar kroner, og oppnådde eit driftsresultat på 331 millionar kroner. Driftsmarginen enda på 18 prosent.

Abonnementsavisene – Stavanger Aftenblad, Bergens Tidende, Fædrelandsvennen og Aftenposten – omsette for 3,48 milliardar kroner, oppnådde eit driftsresultat på 242 millionar kroner og fekk ein driftsmargin på sju prosent.

Aftenposten-sjef Hansen meiner dette vert nøkkelen for Schibsted framover:

– Me har ei forventning om at ambisjonar å vere eit leiande publisistisk selskap, og at me gjer meir av det me har gjort dei siste 20 åra – som er å forstå medieutvikling og kva moglegheiter som ligg der og investerer for framtida.

– Men heilt konkret kva me skal gjere har eg ikkje lyst til å lufte høgt. Eg har nokre idear sjølvsagt, seier han.

– Bruke kapital på å utvikle oss

Bergens Tidende-redaktør Øyulf Hjertenes er ikkje villig til å spekulere offentleg i kva Schibsted bør bruke pengar på.

– Eg er glad konsernet har økonomisk kraft til å gjere investeringar. Å gå inn på journalistikk, produktutvikling og nye område trur eg er bra, seier han.

Helle i Aftenbladet er òg glad Schibsted kan vise til finansielle musklar etter sal av Adevinta-aksjar, og har stor tru på nysatsingar frå konsernet.

– Eg er heilt sikker på at me kan snakke godt saman om store satsingar. Eg har ikkje konkrete ynskjer, men eg vil at ein brukar kapitalen på å utvikle oss, seier han.

VG-redaktør Steiro meiner Schibsted har opparbeidd seg eit solid handlingsrom.

– Det å investere i fleire journalistar er òg opp til selskapa å gjere. Det handlar om å byggje inntektskjelder og ta i bruk ny teknologi som gjer at ein skapar ei robust verksemd over tid. Me må sørgje for at investeringane er i orden, og då trur eg mykje handlar om teknologi, seier han.

Schibsted oppnådde i 2018 kraftig vekst, og oppnådde eit driftsresultat på 3,26 milliardar kroner, og ein driftsmargin på 18 prosent.

Rubrikkannonsane var stadig det som sto for høgast inntening i konsernet. Slik fordelte det seg i fjor:

• Rubrikkannonsar: 2,9 milliardar kroner
• Publikasjonar: 687 millionar kroner
• Schibsted Vekst: 422 millionar kroner
• Andre: -766 millionar kroner

Saka held fram under biletet.

Positiv børsutvikling for Adevinta

Rubrikkselskapet Adevinta har oppnådd gode resultat på børsen sidan noteringa. Då Schibsted selte seg ned til 60 prosent eigardel i selskapet prisa dei aksjen til 78 kroner per stykk. Dagen etter noteringa vart aksjen omsett for rundt 90 kroner, og sidan har den lege stabilt like under 90 kroner aksjen.

– Det har vore ein månad kor kursen har halde eit godt nivå, jamt over tilbodskursen på 78 kroner. Det er jo det ein håpar på, seier styreleiar Sunde.

Schibsted-kursen, derimot, har hatt jamn nedgang sidan børsnoteringa av Adevinta. Sidan fredag 12. april, har aksjekursen gått frå 250 kroner til 228 kroner per 3. mai. Det er ein nedgang på 8,8 prosent.

– Korleis ser du på marknaden sine reaksjonar overfor Schibsted etter å ha skilt ut Adevinta?

– Aksjen har utvikla seg litt svakare, men òg den har utvikla seg bra. Ser ein på Schibsted si utvikling over ein lenger periode har den vore under sterk utvikling. Det reflekterer sjølvsagt at forventningane til Adevinta har vore der, men òg at investorar me har hatt mykje kontakt med det siste året ser at Schibsted sine kjerneverksemder i dei nordiske marknadane er spanande.

– Me har vist at me klarar å drive media på ein god måte, og marknadsplassane i Skandinavia går bra. I tillegg har me mykje spanande i Next-porteføljen.

Sunde ynskjer ikkje å kommentere om Schibsted vil vurdere å selje seg endå lenger ned i Adevinta.

– Det blir eit spørsmål eg iallfall aldri kjem til å kommentere overfor deg, seier han med eit smil.